परभणी (Parbhani) :- येथील पोलिस पेट्रोल पंपावर कर्तव्यावर असताना आर्थिक गैरव्यवहार करत श्रेणी पोलिस उपनिरीक्षकाने ३७ लाख ९४ हजार ५११ रुपयांच्या शासकीय रक्कमेचा अपहार केला. अपहार केल्या प्रकरणी १९ एप्रिल रोजी नानलपेठ पोलिस ठाण्यात पोलिस उपनिरीक्षकावर गुन्हा (crime) दाखल करण्यात आला आहे. सदरचे प्रकरण तपासासाठी आर्थिक गुन्हे शाखेकडे वर्ग करण्यात आले आहे.
पोलिस उपनिरीक्षकाने ३७ लाख ९४ हजार ५११ रुपयांच्या शासकीय रक्कमेचा अपहार केला
सहाय्यक पोलिस निरीक्षक पोलिस कल्याण विभाग बालाजी तोटेवाड यांनी फिर्याद दिली आहे. मे २०२३ ते डिसेंबर २०२३ या कालावधीत पोलिस पेट्रोल पंप येथे श्रेणी पोउपनि. तुकाराम सदाशिव वाघमारे हे कर्तव्यावर असताना त्यांनी सोपविलेले काम योग्य पध्दतीने केले नाही. पोउपनि. तुकाराम वाघमारे यांनी पेट्रोल पंप (Petrol pump) परभणी येथील कामकाजात बेजबाबदारपणा दाखवुन केलेला आर्थिक गैरव्यवहार लपविण्यासाठी विक्री रजिस्टरवर खोटे दस्तऐवज केले. तसेच अपहार करण्यासाठी त्याचे बनावटीकरण करत ३७ लाख ९४ हजार ५११ रुपये एवढ्या शासकीय रक्कमेचा अपहार केला. सदर प्रकरणात श्रेणी पोउपनि. तुकाराम वाघमारे यांच्यावर गुन्हा दाखल करण्यात आला आहे. तपास सपोनि. शिवराज जमदडे करत आहेत.
