सदाबहार हिंदी गीतांनी जागवल्या जुन्या आठवणी; गोल्डन स्ट्रिंग्स म्युझिकल ग्रुपचा सुरेल नजराणा
नागपूर (Superhits of Black and White Era) : ब्लॅक अँड व्हाइट चित्रपटांचा सुवर्णकाळ, अजरामर गीतांचे सूर आणि जुन्या आठवणींचा सुगंध... अशा सुरेल वातावरणात नागपूरकर रसिकांना हिंदी चित्रपटसंगीताच्या सुवर्णयुगाची सफर घडली. गोल्डन स्ट्रिंग्स म्युझिकल ग्रुपतर्फे बुधवारी, 4 नोव्हेंबर 2026 रोजी लक्ष्मीनगर येथील सायंटिफिक हॉलमध्ये आयोजित ‘सुपरहिट्स ऑफ ब्लॅक अँड व्हाइट एरा’ या विशेष संगीत मैफलीला रसिकांचा उत्स्फूर्त प्रतिसाद मिळाला. जुन्या हिंदी चित्रपटांतील लोकप्रिय गीतांच्या सादरीकरणाने उपस्थित संगीतप्रेमी मंत्रमुग्ध झाले.
कार्यक्रमात ज्योती बनकर, मनश्री जोशी, गिरीश बडे, आनंद गायधनी, धीरज पारपल्लीवार, निलिमा उराडे आणि साक्षी त्यागी या गायकांनी आपल्या सुमधुर आवाजातून सदाबहार गीतांचा नजराणा सादर केला. जुन्या चित्रपटांतील गाजलेल्या गीतांचे सूर सभागृहात घुमताच रसिक जुन्या आठवणींमध्ये रमून गेले. भावपूर्ण गायन आणि मधुर संगीताच्या संगमामुळे मैफलीला विशेष रंगत आली.
नियोजनबद्ध आयोजनातून सुरेल सादरीकरण
या (Superhits of Black and White Era) कार्यक्रमाची संकल्पना आणि आयोजन अमित अंधारे यांनी केले, तर धनश्री सेवलकर यांनी सूत्रसंचालनाची जबाबदारी सांभाळली. परिमल जोशी आणि त्यांच्या टीमने संगीत संयोजन केले. राजेश अमीन यांनी स्टेज व्यवस्थापन, गुलशन यांनी प्रकाशयोजना, मनोज पिदड्डी यांनी व्हिडिओ चित्रीकरण, तर ऋषभ धोंमणे यांनी ध्वनी व्यवस्थेची जबाबदारी सांभाळली.
प्रायोजकांचे सहकार्य
या संगीत मैफलीला कूल मेकर्स, रचना कन्स्ट्रक्शन कंपनी, मेगास्पॅन इन्फ्रा व्हेंचर्स आणि JIC यांचे सहकार्य लाभले. जुन्या हिंदी चित्रपटगीतांचा अमूल्य ठेवा नव्या पिढीपर्यंत पोहोचविण्यासह संगीतप्रेमींना सुवर्णकाळातील सुरांचा आनंद देणारी ही मैफल ठरली. कार्यक्रमाच्या यशस्वी आयोजनासाठी सहकार्य करणाऱ्या सर्व प्रायोजकांचे आयोजकांनी आभार मानले.