निराधार महिलेस फॉल पिको शिलाई मशीन देऊन एचएआरसी संस्थेने जपली सामाजिक बांधिलकी!
औंढा नागनाथ (Bhaubij) : होमिओपॅथिक अकॅडमी ऑफ रिसर्च अँड चॅरिटीज (HARC) संस्थेतर्फे भाऊबीज सणा निमित्ताने पुरजळ येथील निराधार विधवा ताई शितल ईघाटे यांना उदरनिर्वाहासाठी ऑल इन वन शिलाई मशीन भेट देण्यात आले. या उपक्रमावेळी एचएआरसी अध्यक्ष डॉ. पवन चांडक,समन्वयक प्रकाश डूबे, ऍड चंद्रकांत राजुरे, संजय लाहोटी, सुनील डूबे, भगवान डूबे, महादू डूबे, आदित्य डूबे आदी उपस्थित होते.
पार्श्वभूमी:
औंढा नागनाथ तालुक्यातील पुरजळ येथील रहिवासी असलेल्या शितल ईघाटे यांच्या पतीचे 25 ऑक्टोबर 2020 मध्ये दुर्दैवी अपघातामध्ये निधन झाल्यावर त्यांना वयाच्या अवघ्या 23 व्या वर्षी वैधव्य नशिबी आले.पतीच्या दुर्देवी मृत्यूनंतर सासरचा आधार गेला. माहेरात वडील नसल्यामुळे सध्या त्या माहेरी पूरजळ येथे आईसोबत राहत असून दुःख बाजूला सारून रोज शेतात मजुरी करून उदरनिर्वाह करीत आहेत.त्यांना कोणत्याही शासकीय योजनेचा लाभ मिळत नाही. त्यांना दोन मुले असून एक पाचवीत व दुसरा तिसरीत शिकतो.त्यांच्या या अत्यंत हलाखीच्या परिस्थितीची दुःखद व्यथा जिल्हा परिषद प्राथमिक शाळा पुंगळाचे शिक्षक प्रकाश डूबे यांनी भेट घेऊन जाणून घेऊन कैफियत एच.ए.आर.सी. संस्थेकडे मांडली. त्या ताईंना शिलाई काम येत असल्यामुळे उदरनिर्वाहाचे साधन म्हणून फॉल पिको सुविधा असलेली ऑल इन वन शिलाई मशीन (Sewing Machine) देण्याचे त्यांनी आवाहन केले होते. त्यांच्या आवाहनाला प्रतिसाद देऊन आज भाऊबीज निमित्त प्रत्यक्ष त्यांच्या घरी जाऊन मदत देण्यात आली.