जांभळी सडक महामार्गावरील घटना
सेंदूरवाफा/साकोली (Bike Accident) : पिंपळगाव / सडक येथील शंकरपट पाहून परत येत असताना मोटरसायकलस्वार रोडवर पडले व तेवढ्यात जाणार्या अज्ञात ट्रकने त्यांना चिरडले. त्यात त्यांचा घटनास्थळी मृत्यू झाला. ही घटना दि. ५ फेब्रुवारी २०२५ रोजी दुपारी २.३० वाजतादरम्यान राष्ट्रीय महामार्गावर जांभळी सडक येथे घडली. मृतकाचे नाव प्रमोद जैराम कापगते असल्याची माहिती आहे.
साकोली तालुक्यातील कटंगधरा / सासरा येथील प्रमोद जैराम कापगते (३५) हे आपल्या दुचाकी क्र. एम. एच. ३५ जे ६८६ हीरो होंडा सीडी १०० एसएसने पिंपळगांव सडक येथे सुरू असलेला शंकरपट पाहून परत आपल्या गावाकडे जात असतांना जांभळी / सडक टी – पॉईंट परीसरात अचानक दुचाकीवरून खाली पडले. तेवढ्यात लाखनीवरून साकोलीकडे जाणार्या अज्ञात ट्रकने त्यांना चिरडले. त्यात त्यांचा (Bike Accident) घटनास्थळी दुर्दैवी मृत्यू झाला. घटनेनंतर अज्ञात ट्रक पसार झाला असून पोलीस शोध घेत आहेत.
मृतक प्रमोद कापगते, हे साकोली उपजिल्हा रुग्णालय येथे मजूरी कामावर होते व त्यांना पत्नी व चार व दोन वर्षांच्या दोन चिमुकल्या मुली आहेत. घटनेपश्चात तिथून डॉ. नेपाल रंगारी भंडाराकडे जात होते. त्यांनी लगेच महामार्ग रूग्णवाहिकेला १०८ वर फोन करून मृतकाचे शव शवविच्छेदनासाठी उपजिल्हा रुग्णालय साकोली येथे पाठविले. (Bike Accident) मृतक हा मोलमजूरी करून आपला उदरनिर्वाह करत होता. त्यांच्या आकस्मिक मृत्यूनंतर त्यांच्या कुटुंबियांवर मोठा आघात झाला आहे. चिमुकल्या दोन मुली आणि पत्नी यांच्यावर मोठे पहाड कोसळले आहे. प्रमोदच्या अपघाती मृत्यूची बातमी कळताच कटंगधरा सासरा परिसरात शोककळा पसरली आहे.
