मुंबईत भाजप–शिवसेना युतीने ओलांडला अर्धा टप्पा
मुंबई (BMC Election 2026) : महाराष्ट्रातील २९ महानगरपालिका निवडणुकांची मतमोजणी सुरू असून, सुरुवातीच्या आकडेवारी मध्ये भारतीय जनता पार्टी–शिवसेना युती आघाडीवर असल्याचे चित्र दिसत आहे.
मुंबईत वॉर्ड 220 मध्ये शिवसेना (उबाठा)च्या संपदा मयेकर यांचा विजय, तर वॉर्ड 221 मध्ये भाजपचे आकाश पुरोहित विजयी. आतापर्यंत 227 पैकी 127 जागांवर महायुतीने आघाडी घेतली आहे.
मुंबईत प्रभाग १८७ मध्ये ठाकरे गटाचे जोसेफ कोळी विजयी झाले असून त्यांनी शिंदे गटाच्या वकिल शेख यांचा ७,०६७ मतांनी पराभव केला. प्रभाग क्रमांक १६९ मध्ये मंगेश कुडाळकरांना मोठा धक्का बसला असून त्यांचे पुत्र जय कुडाळकर पराभूत झाले, तर ठाकरे गटाच्या प्रविणा मोराजकर विजयी झाल्या.
दुपारी ३.२० वाजेपर्यंत भाजप १,१७१ प्रभागांमध्ये आघाडीवर असून, मित्रपक्ष शिवसेना ३०० प्रभागांमध्ये पुढे आहे. आतापर्यंतच्या आकडेवारी नुसार भाजपप्रणीत युती ११६ प्रभागांमध्ये आघाडीवर आहे, तर ठाकरे बंधूंची आघाडी ८१ प्रभागांमध्ये पुढे आहे.
मुंबई महानगरपालिकेच्या निवडणुकांमध्ये आतापर्यंत ११८ जागांचे निकाल जाहीर झाले आहेत. या निकालांमध्ये शिवसेना (शिंदे गट) आणि शिवसेना (उद्धव बाळासाहेब ठाकरे गट) यांच्यात चुरशीची लढत पाहायला मिळत आहे.दरम्यान, मुंबई भाजपचे नेते रुपेश सावरकर यांनी प्रभाग क्रमांक ६३ मधून विजय मिळवला आहे. तसेच प्रभाग क्रमांक २५ मधून भाजपच्या निशा परुळेकर विजयी झाल्या आहेत. भाजपचेच प्रकाश दरेकर यांनीही निवडणुकीत यश संपादन केले आहे.
मुंबई महानगरपालिकेच्या निवडणुकांत महत्त्वाचे निकाल समोर आले आहेत. अरुण गवळी यांच्या दोन्ही मुली—प्रभाग २१२ मधील गीता गवळी व प्रभाग २०७ मधील योगिता गवळी—पराभूत झाल्या आहेत. वरळीत मनसेच्या रचना साळवी यांचा पराभव झाला असून शिंदे गटाच्या वनिता नरवणकर विजयी झाल्या. भाजपने बोरिवलीत प्रभाग १४ मधून सीमा शिंदे व प्रभाग १३ मधून राणी द्विवेदी, तर मुलुंड प्रभाग १०८ मधून दीपिका घाग यांचा विजय नोंदवला. दिंडोशी प्रभाग ४० मधून शिवसेना (उबाठा)चे तुळशीराम शिंदे विजयी झाले. एमआयएमच्या शबाना शेख व नवाब मलिक यांच्या सुनेलाही यश मिळाले. दहिसर प्रभाग ५ मध्ये शिंदे गटाचे संजय घाडी विजयी झाले असून ठाकरे गटाच्या सुजाता पाटेकर यांचा पराभव झाला आहे.
