१२७५ शेतकऱ्यांची सीसीआयला पसंती!
मानोरा (Cotton Procurement): कोहिनूर जिनिंग प्रेसिंग मौजे विठोली येथील सीसीआय कापूस खरेदी केंद्रावर मानोरा तालुक्यातील १ हजार २७५ शेतकऱ्यांनी २५ हजार ६६४ क्विंटल कापूस विक्री केला असुन मुदतीत नोंदणी केलेल्या शेतकऱ्यांचा कापूस खरेदी केंद्रावर मोजणी सुरू असल्याने शेतकऱ्यांना दिलासा मिळाला आहे. अनेक शेतकऱ्यांनी शासकीय दराने कापूस विकण्यासाठी पणन महासंघाच्या पोर्टलवर नोंदणी केलेली होती. मात्र खरेदीची मुदत संपल्याने आणि सीसीआय केंद्रावरील गर्दीमुळे शेतकऱ्यांचा कापूस अद्याप विकला गेला नव्हता. मुदत संपल्यानंतर हा कापूस व्यापाऱ्यांना कमी दराने विकावा लागेल की काय ? अशी भीती शेतकऱ्यांमध्ये होती. ही अडचण लक्षात घेऊन प्रशासनाने नोंदणी कृत शेतकऱ्यांसाठी खरेदी सुरू करणे ठेवण्याचा निर्णय घेतल्यामुळे शेतकऱ्यांमध्ये आनंदाचे वातावरण पहावयास मिळत आहे.
सध्या खुल्या बाजारात कापसाचे दर हमीभावापेक्षा कमी किंवा त्याच्या आसपास आहेत. अशा परिस्थितीत सरकारकडून मिळणारा किमान आधारभूत दर शेतकऱ्यासाठी फायदेशीर ठरत आहे. खाजगी व्यापारी अनेकदा कापसातील ओलावा किंवा दर्जाचे कारण पुढे करून दर पाडतात. मात्र शासकीय केंद्रावर नियमानुसार पूर्ण दर मिळत असल्याने शेतकऱ्यांचा कल या केंद्राकडे वाढला आहे. यावेळी प्रस्तुत प्रतिनिधीने सीसीआय केंद्राला भेट दिली असता सेंटर इन्चार्ज दीपक शर्मा, सीसीआयचे ग्रेडर त्रिलोक खानोद, कोहिनूर जीनिंगचे संचालक तस्लिम शेठ, सीसीआय कर्मचारी मनीष शर्मा, बाजार समिती कर्मचारी हरीश राऊत व सतीश इंगोले आदी उपस्थित होते.
ज्या शेतकऱ्यांनी विहित मुदतीत सातबारा उतारा, आणि इतर कागदपत्रासह नोंदणी पूर्ण केली आहे. त्यांना घाबरण्याचे कारण नाही. ज्या शेतकऱ्याकडे नोंदणीची टोकन आहे. त्यांना त्यांच्या क्रमानुसार बोलावले जाईल, तसेच खरेदी बंद झाल्याचा पवार विश्वास न ठेवता शेतकऱ्यांनी सीसीआय केंद्राशी संपर्क साधावा, असे आवाहन कोहिनूर जिनिंग चे संचालक व बाजार समिती यांनी केले आहे.
