लातूर महानगरपालिका निवडणुकीत काँग्रेसचा दणदणीत विजय
लातूर (Municipal Corporation Election) : लातूर महानगरपालिका निवडणुकीत 70 पैकी 47 जागा मिळवून काँग्रेसने दणदणीत विजय मिळवला. लातूरमध्ये काय म्हणतोय लातूर? असा सवाल करीत भाजपने सुरू केलेल्या प्रचाराला ‘पंजा म्हणतंय लातूर!’, असे खणखणीत उत्तर लातूरकरांनी दिले आहे. या निवडणूक निकालाने काँग्रेसचे नेते अमित देशमुख यांच्या नेतृत्वावर लातूरकरांनी विश्वास व्यक्त केला असून आमदार संभाजी पाटील निलंगेकर यांच्या मनमानीचा फटका भाजपाला बसला आहे. भाजपाला या निवडणुकीत 22 जागा मिळाल्या. विशेष म्हणजे वंचित बहुजन आघाडीला 4 जागा तर राष्ट्रवादी काँग्रेस अजित पवार पक्षाला केवळ एका जागेवर समाधान मानावे लागले.
लातूर महानगरपालिका निवडणुकीत काँग्रेस विरुद्ध भाजपा अशी लढत होत असताना राष्ट्रवादी काँग्रेस अजित पवार पक्षानेही या निवडणुकीत मुसंडी महाराज जवळपास 65 जागांवर आपले उमेदवार उभे केले होते. निवडणूक प्रचारादरम्यान काँग्रेस व काँग्रेसचे नेते आ. अमित देशमुख यांना घेण्याचा पुरता डाव सत्ताधारी भाजपा तसेच राष्ट्रवादी काँग्रेस अजित पवार पक्षाने टाकला होता. यासाठी लातूरमध्ये मुख्यमंत्री देवेंद्र फडणवीस, भाजपा प्रदेशाध्यक्ष रवींद्र चव्हाण, महसूल मंत्री बावनकुळे, आमदार संभाजी पाटील, आमदार अभिमन्यू पवार, आमदार रमेश आप्पा कराड, राज्य कृषी मूल्य आयोगाचे अध्यक्ष पाशा पटेल यांच्या सभा झाल्या. तर राष्ट्रवादीच्या प्रचारार्थ उपमुख्यमंत्री अजित पवार, रिपब्लिकन सेनेचे सरसेनापती आनंदराज आंबेडकर, सहकार मंत्री बाबासाहेब पाटील, माजी मंत्री संजय बनसोडे, आमदार विक्रम काळे यांच्या सभा झाल्या. काँग्रेसच्यावतीने काँग्रेसचे नेते दिलीपराव देशमुख, आमदार अमित देशमुख तसेच वंचित बहुजन आघाडीचे अध्यक्ष एडवोकेट प्रकाश आंबेडकर यांच्या सभा झाल्या.
लोकनेते विलासराव देशमुख यांच्या आठवणी पुसून टाकण्याचे भाजपाचे प्रदेशाध्यक्ष रवींद्र चव्हाण यांनी केलेले आवाहन लातूरकरांनी सपशेल फेटाळत ‘सुसंस्कृत लातूर’चा शिक्का पुन्हा एकदा या निवडणुकीने अधिक गडद केला आहे. या निवडणुकीत काँग्रेसला 43, वंचित बहुजन आघाडीला 4, भाजपाला 22 तर राष्ट्रवादी काँग्रेस अजित पवार पक्षाला केवळ एका जागेवर विजय मिळाला.
या निवडणुकीत एकनाथ शिंदे यांची शिवसेना, शरद पवारांची राष्ट्रवादी तसेच एम आय एम या पक्षांना खातेही उघडता आले नाही.
