लातूर(Latur) :- ज्येष्ठ विचारवंत प्राचार्य डॉ. नागोराव कुंभार यांना सातारा येथील भारतीय भटके विमुक्त विकास व संशोधन संस्था व फुले-आंबेडकर साहित्य पंचायतचा २०२३-२४ चा फुले-आंबेडकर साहित्य पुरस्कार (Award) जाहीर झाला आहे. भटक्या विमुक्त जमाती संघटनेचे अध्यक्ष सुप्रसिद्ध साहित्यिक तथा माजी आमदार लक्ष्मण माने यांनी ही घोषणा केली.
ज्येष्ठ नेते खा. शरद पवार यांच्या हस्ते ९ जुलैला सातारा येथे वितरण
या पुरस्काराचे वितरण संस्थेचे अध्यक्ष आणि देशातील ज्येष्ठ नेते खासदार शरद पवार (MP Sharad Pawar) यांच्या हस्ते ९ जुलै २०२४ रोजी सकाळी १० वाजता सातारा येथे होणार आहे. या समारंभाचे अध्यक्षस्थान माजी खासदार श्रीनिवास पाटील हे भूषविणार आहेत. भारतीय भटके-विमुक्त विकास व संशोधन संस्था व फुले-आंबेडकर साहित्य पंचायत या संस्थांच्यावतीने दरवर्षी या पुरस्काराचे आयोजन केले जाते. यंदाच्या वर्षी फुले-आंबेडकर साहित्य पुरस्कारासाठी निवड झालेल्या प्राचार्य डॉ. नागोराव कुंभार हे गेली ३८ वर्षे सातत्य व गुणवत्ता टिकवून विचारशलाका या नियतकालिकाचे संपादन करीत आहेत. राजर्षी शाहू महाराज, महात्मा फुले आणि डॉ. बाबासाहेब आंबेडकर (Dr. Babasaheb Ambedkar) यांच्या विचारधारेचा आणि स्वातंत्र्य, समता, बंधुता, न्याय, लोकशाही, समाजवाद, धर्मनिरपेक्षता आदी मूल्ये आणि तत्वांचा तसेच भारतीय संविधान यांच्या प्रचार व प्रसाराचे कार्य प्राचार्य डॉ. नागोराव कुंभार यांनी लातूरसारख्या शहरात राहून अत्यंत व्रतस्थवृत्तीने केले आहे.
अनेक पुरस्कारांनी यापूर्वी त्यांना सन्मानित करण्यात आले
महाराष्ट्र शासनाचा डॉ. बाबासाहेब आंबेडकर दलित मित्र पुरस्कार, स्वामी रामानंद तीर्थ मराठवाडा विद्यापीठाचा पहिला आदर्श शिक्षक पुरस्कार, आंतरराष्ट्रीय शिक्षण व व्यवस्थापन संस्था, दिल्लीचा उत्कृष्ट प्राचार्य पुरस्कार, महाराष्ट्र फाऊंडेशनचा पुरस्कार आणि पुण्याच्या महाराष्ट्र साहित्य परिषदेचा श.वा. किर्लोस्कर पुरस्कार या व इतर अनेक पुरस्कारांनी यापूर्वी त्यांना सन्मानित करण्यात आले आहे.
५० ग्रंथांचे संपादन
महात्मा गांधीजींचे सामाजिक तत्त्वज्ञान, महात्मा गांधीजींची सत्याग्रहाची संकल्पना, भ्रष्टाचार : स्वरूप व संदर्भ, डॉ. आंबेडकरांचे शैक्षणिक तत्त्वज्ञान, महाराष्ट्रातील ध्येयवादी तत्वचिंतक, सामाजिक कार्याच्या दिशा, विचारतरंग, तरुण मनाच्या वाटा आणि वळणे आदी ग्रंथाचे लेखन आणि तसेच त्यांनी चिंतन एका कुलगुरूचे, शिक्षण विचार, महाराष्ट्रातील समाजचिंतन, सर्वस्पर्शी डॉ. बाबासाहेब आंबेडकर आणि यशवंतराव चव्हाण आदी ५० ग्रंथांचे संपादन डाॕ. नागोराव कुंभार यांनी केले आहे.
सामाजिक क्षेत्रात भरीव कार्य
राज्य मागासवर्ग आयोगाचे सदस्य, महाराष्ट्र तत्वज्ञान परिषद अध्यक्ष, महाराष्ट्र राज्य मराठी विश्वकोश निर्मिती मंडळ व महाराष्ट्र राज्य दर्शनिका संपादक मंडळ सदस्य आणि पुणे येथील माध्यमिक व उच्च माध्यमिक शिक्षण मंडळाच्या तत्त्वज्ञान अभ्यास मंडळाचे अध्यक्ष म्हणून डाॕ. नागोराव कुंभार यांनी सामाजिक क्षेत्रात भरीव कार्य केलेले आहे.
