परभणी/गंगाखेड (Parbhani) :- बँकेच्या कर्जाला कंटाळून उंदीर मारण्याचे औषध प्राशन केलेल्या शेतकऱ्याचा शुक्रवार रोजी मृत्यु (Death) झाल्याची घटना पूर्णा तालुक्यातील देउळगाव दुधाटे येथे घडली आहे. याप्रकरणी गंगाखेड पोलीस ठाण्यात अकस्मात मृत्युची नोंद करण्यात आली आहे.
शेतकऱ्याची आत्महत्याचे सत्र थांबना
याबाबत समजलेली अधिक माहिती अशी की गंगाखेड पोलीस ठाण्याच्या हद्दीत असलेल्या पूर्णा तालुक्यातील देउळगाव दुधाटे येथील शेतकरी रामेश्वर नागोराव दुधाटे वय 55 वर्ष यांनी शेती गहाण ठेवून बँकेकडून कर्ज घेतले होते. शेती चांगली पिकत नसल्यामुळे व पिकाला व्यवस्थित भाव मिळत नसल्याने शेतीवर घेतलेले बँकचे कर्ज फिटेल किंवा नाही असे मनावर घेवून नेहमी चिंतेत राहत शेतीवर घेतलेल्या बँकेचे कर्जाला कंटाळून रामेश्वर नागोराव दुधाटे यांनी बुधवार 16 एप्रिल रोजी सकाळी 6 ते दुपारी 1 वाजे दरम्यान शेतात जावून उंदीर मारण्याचे औषध (Poison)प्राशन केले. त्यांना उपचारासाठी परभणी येथील खाजगी रुग्णालयात दाखल असता त्यांच्या प्रकृतीत सुधार होण्याऐवजी बिघाड होत असल्याने डॉक्टरांनी शुक्रवार 18 एप्रिल रोजी सायंकाळी 7:30 वाजेच्या सुमारास पुढील उपचारासाठी त्यांना रुग्णवाहिकेतून छत्रपती संभाजी नगर येथे हलविले. त्यांची प्रकृती जास्तच बिघडल्याने परभणी येथील शासकीय रुग्णालयात दाखल केले असता शुक्रवार रोजी रात्री 9 वाजेच्या सुमारास डॉक्टरांनी त्यांना तपासून मयत घोषीत केले. याप्रकरणी मयत रामेश्वर नागोराव दुधाटे यांचा मुलगा बद्रीनाथ रामेश्वर दुधाटे वय 24 वर्षे रा. देउळगाव दुधाटे ता. पूर्णा यांने दिलेल्या खबरीवरून शनिवार 19 एप्रिल रोजी पहाटे गंगाखेड पोलीस ठाण्यात अकस्मात मृत्युची नोंद करण्यात आली आहे. याचा पुढील तपास सपोनि सिद्धार्थ इंगळे हे करीत आहे.
