खत विक्रेत्यांकडे कृषी विभागासह प्रशासनाची डोळेझाक
महादेव कुंभार
लातूर (Urea fertilizer) : लातूर जिल्ह्यातील सर्वच बाजारपेठांमध्ये शेतकऱ्यांना युरिया खत (Urea fertilizer) मिळणे दुरापास्त झाले असून युरियाची कृत्रिम टंचाई करून कृषी विभागाच्या आशीर्वादाने खत विक्रेते शेतकऱ्यांची सरास लूट करीत आहेत. ‘युरिया घ्यायचा असेल तर, दुसरे काहीतरी घेतले पाहिजे… तरच युरिया मिळेल,’अशी अट घालत शेतकऱ्यांना बाजारात नागविले जात आहे. या प्रकाराकडे कोणत्याही लोकप्रतिनिधीचे लक्षण असल्याने आणि अधिकाऱ्यांनी डोळेझाक केल्याने खत विक्रेत्यांचे चांगभले होत आहे.
लातूर जिल्ह्यात गेला पावसाळा चांगला झाला. साडेपाच महिन्यावर पावसाळा झाल्याने सर्वत्र सुबत्ता निर्माण झाली. (Urea fertilizer) जमिनीतील पाणी पातळी व्यवस्थित असून त्याचा लाभ घेत शेतकऱ्यांनी यंदा मोठ्या प्रमाणात ऊस लागवड केली आहे. शिवाय पाणी चांगले असल्याने रबी हंगामातही शेतकऱ्यांनी मोठ्या प्रमाणात गहू, ज्वारी आदींचा पेरा केला आहे. यंदा उसाला प्रति मॅट्रिकटन 3000 रुपये भाव जवळपास जाहीर झाल्याने शेतकरी ऊस पीक घेण्याकडे आकर्षित झाला आहे. एकरी 45-50 टन उतारा मिळाला तर शेतकऱ्याला एकरी लाख दीड लाख रुपयांचे उत्पादन मिळवून ऊस शेती तारेल, असा आशावाद शेतकरी वर्गात आहे. त्यामुळे शेतकऱ्यांनी मोठ्या प्रमाणावर ऊस लागवड केली आहे.
ऊस लागवडीनंतर ऊस पिकाला जोरदार फुटवे येण्यासाठी (Urea fertilizer) युरिया खताची मात्रा द्यावी, असे विविध कृषी तज्ञांकडून सुचविले गेल्याने शेतकऱ्यांनी खताला युरिया देण्यासाठी सध्या धावपळ चालविली आहे. प्रति एकरी एक पोते युरिया शेतकऱ्यांना हवा असतो. त्यासाठी शेतकऱ्यांनी आपल्या जवळच्या बाजारामध्ये चकरा चालविल्या आहेत. अनेक हेलपाटे घालूनही शेतकऱ्यांना युरिया काही मिळता मिळत नाही. बाजारात खत विक्रेत्यांनी युरियाची लिंकिंग चालविली आहे. रॅक लागतानाच आम्हाला निव्वळ युरिया मिळाला नाही, त्यामुळे आम्ही तरी कसा युरिया तुम्हाला द्यावा? असा सरळ सवाल करीत युरिया पाहिजे असेल तर दुसरं काहीतरी घेतलं पाहिजे, अन्यथा युरिया मिळणार नाही! असे ठासून खतविक्रेते शेतकऱ्यांना परत पाठवत आहेत. कृषी विभागाला मात्र शेतकऱ्यांच्या या हालअपेष्टेचे काही देणे घेणे नाही, असेच सध्यातरी दिसत आहे.
भरपूर युरिया आहे, शेतकऱ्यांनी प्रत्यक्ष जावे!
बाजारामध्ये युरियाचा साठा भरपूर आहे. शेतकऱ्यांनी प्रत्यक्ष जाऊन (Urea fertilizer) युरिया खरेदी करावा. हस्ते पर हस्ते किंवा वाहन चालकांना पाठवून युरिया खरेदी करू नये. शेतकऱ्याच्या नावाखाली अनेक वाहनचालक विक्रेत्यांकडून युरियाची खरेदी करीत आहे व परस्पर विकत असल्याच्या तक्रारी आल्याने कृषी विभागाने त्याबाबत काळजी घेतली आहे. शेतकऱ्यांना युरिया मिळतो, शेतकऱ्यांनी प्रत्यक्ष जाऊन विक्रेत्यांकडून युरिया घ्यावा.
-जि.प. कृषी अधिकारी सुपेकर, लातूर.
लातूर जिल्ह्यात अनेक खतविक्रेत्याकडून युरियाची लिंकिंग खुलेआमपणे केली जात आहे. युरिया चा साठा किती आहे, हे कळण्याची व्यवस्था कृषी विभागाने केली असली तरी प्रशासनाच्या आशीर्वादाने खत विक्रेते शेतकऱ्याची लूट करीत आहेत. हे थांबले पाहिजे. शेतकऱ्यांना युरिया हवा असल्यास युरियाच दिला जावा, त्यासोबत इतर काही घेण्याची शक्ती करणे गैर आहे. याबाबत कृषी विभागाने सतर्क राहणे आवश्यक आहे.
-रुपेश शंके, जिल्हाध्यक्ष शेतकरी संघटना लातूर.
