नेर (Yawatmal) :- दारवा रोड वरील असलेला कचरा डेपोच्या परिसरात गुरुवारी दुपारी तीन वाजता लागलेली भीषण आग (Fire) अखेर शनिवारी सकाळपर्यंत जवळपास ९५ टक्के नियंत्रणात आली आहे. ही आग विझवण्यासाठी यवतमाळ येथील अग्निशमन दलाच्या सलग दहा ते बारा फेर्‍या झाल्या असून, सुदैवाने या दुर्घटनेत कोणतीही जीवितहानी किंवा यंत्रसामग्रीचे नुकसान झालेले नाही, अशी माहिती आरोग्य विभागाचे अभियंता भूषण चव्हाण यांनी दिली. गुरुवारी अचानक लागलेल्या आगीने परिसरात एकच खळबळ उडवून दिली होती. धुराचे मोठे लोळ आकाशात पसरले होते.
या दुर्घटनेत कोणतीही जीवितहानी किंवा यंत्रसामग्रीचे नुकसान झालेले नाही
परिस्थितीचे गांभीर्य लक्षात घेता अग्निशमन दलाच्या ताफ्याने तात्काळ घटनास्थळी धाव घेतली. सलग २४ तासांच्या अथक प्रयत्नांनंतर शनिवारी सकाळपर्यंत ही आग नियंत्रणात आणण्यात यश आले.‘सध्या आग पूर्णपणे नियंत्रणात असून, उर्वरित ५ टक्के आगीवर देखील लवकरच नियंत्रण मिळवण्यात येईल. कोणतीही मशीनरीचे नुकसान झालेले नाही. आणि सुदैवाने एकाही व्यक्तीच्या जिवाला धोका झालेला नाही,’ असे भूषण चव्हाण यांनी दैनिक देशोन्नतीशी (Deshonnati) बोलताना स्पष्ट केले.या घटनेमागचे नेमके कारण अद्याप स्पष्ट झाले नसले तरी आगीच्या स्रोताबाबत स्पार्किंगची शक्यता वर्तवण्यात येत आहे. याबाबत पुढील तपास सुरू असल्याची माहिती अधिकार्‍यांनी दिली आहे. या आगीत कोणतीही वित्तीय वा मानवी हानी न झाल्याने प्रशासनाचा कार्यप्रदर्शन निश्चितच कौतुकास्पद ठरले आहे. आग लागल्यानंतर तात्काळ कार्यवाही, योग्य नियोजन आणि सातत्यपूर्ण प्रयत्नांमुळे मोठा अनर्थ टळला, अशी प्रतिक्रिया स्थानिक नागरिकांनी दिली. संबंधित विभागांकडून आता या आगीच्या कारणांचा सखोल अभ्यास केला जात असून भविष्यात अशा घटनांची पुनरावृत्ती टाळण्यासाठी खबरदारीचे उपाय योजले जातील, अशी अपेक्षा आहे.
