भंडारा शहरातील बडा बाजारातील बिसेन हॉटेलला भीषण आग

भंडारा (Bhandara) :- शहरातील बडा बाजार येथे गुरुवार दि.९ मे २०२४ रोजी पहाटे सकाळी ५ वाजता दरम्यान बिसेन हॉटेलला भीषण आग (terrible fire) लागली. अग्निशमन दलाला (fire brigade) आग लागल्याची सूचना मिळताच तात्काळ अग्निशमन वाहन घटनास्थळी रवाना करण्यात आले. काही मिनिटाच्या आत अग्निशमन दल घटनास्थळी पोहोचल्याने अनर्थ टळला. अवघ्या तीस मिनिटांमध्ये आगीवर नियंत्रण मिळवण्यात अग्निशमन दलाच्या जवानांना यश आले.

भंडारा शहरातील बडा बाजार परिसरात प्रसिद्ध बिसेन हॉटेल (Bisen Hotel) आहे. लोकेश कारेमोरे यांच्या बिसेन हॉटेलच्या तिसर्‍या माळ्यावर शेव चिवडा, खारा, मिठाई, डालडा साठवणूक केलेल्या खोलीमध्ये प्रचंड आग लागली. मॉर्निंग वॉकला (Morning walk)  जाणार्‍या तेथील एका नागरिकाने बिल्डिंगमध्ये मोठ्या प्रमाणात धूर बाहेर येत असल्यास दिसताच त्यांनी लगेच अग्निशमन दलाला कॉल केला. मोठ्या प्रमाणामध्ये खारा मसाला यांचे प्लास्टिक पॉकिट (Plastic pocket) बंद कपाटात असल्यामुळे आग भडकत होती. आगीची तीव्रता बघून अग्निशमन अधिकारी यांनी घटनास्थळी दुसरे अग्निशमन वाहन क्रमांक एम एच ३६ ए ए २५२९ सुद्धा पाचरण करण्यात आले. खूप मोठ्या प्रमाणामध्ये धुराचे लोट बाहेर निघत होते. अशा वेळी काच फोडून वेंटिलेशन करण्यात आले. तिखट धुरामध्ये काम करणे अवघड होते. परंतु अग्निशमन दलाच्या जवानांनी शर्तीचे प्रयत्न करून आग विझवली असे अग्निशमन अधिकारी समीर गणवीर यांनी सांगितले. ७ एलपीजी व्यावसायिक गॅस सिलेंडर (Gas cylinder)लगेच बाहेर काढल्यामुळे मोठी जीवितहानी टळली असून परिसरातील नागरिकांच्या सतर्कतेमुळे अग्निशमन दलाला लगेच सूचना प्राप्त झाली असेही गणवीर यांनी सांगितले.

मुख्याधिकारी करणकुमार चव्हाण यांच्या मार्गदर्शनात तसेच नगर अग्निशमन अधिकारी समीर गणवीर यांच्या नेतृत्वामध्ये वाहन चालक कृष्णा मसराम, रवींद्र कुमार खंगारे, फायरमन अखिल शेख व सागर गभने यांनी कठीण परिश्रम घेत आगीवर नियंत्रण मिळविले आहे. यात कोणतीही जीवितहानी झाली नाही.