आखाडा बाळापूर/हिंगोली (Tantamukt Abhiyan) : कळमनुरी तालुक्यातील माळधावंडा येथील तंटामुक्त समिती माजी अध्यक्ष बाळासाहेब आनंदराव मस्के (५६) यांना बेदम मारहाण झाली होती या मारहाणीत गंभीर जखमी होऊन उपचारा दरम्यान त्यांचा मुत्यू झाला होता. सदर प्रकरणी आठ जणाविरूद्ध खूनाचा गुन्हा दाखल करण्यात आला.गुन्हा दाखल झाल्यानंतर सगळे आरोपी फरार होते. आठपैकी पाच आरोपींना बाळापूर पोलीस पथकाने अटक केली आहे.
कळमनुरी तालुक्यातील माळधावंडा येथील माजी तंटामुक्त समीती अध्यक्ष बाळासाहेब मस्के यांना १३ ऑक्टोंबर रोजी गावातील चावडी समोरील रस्त्यावर लोखंडी रॉड लाकडाने जिवे मारण्याच्या उद्देशाने बेदम मारहाण करण्यात आली होती. यात ते गंभीर जखमी झाल्याने नांदेड रूग्णालयात त्यांना दाखल करण्यात आले होते. दोन दिवसानंतर उपचारा दरम्यान त्यांचा मृत्यू झाला. यामुळे सदर प्रकरणी तीन महिलांसह आठ जणांविरूद्ध आखाडा बाळापूर पोलीस स्थानकात खुनाचा गुन्हा १६ ऑक्टोंबर रोजी दाखल करण्यात आला होता. गुन्हा दाखल होताच सगळे आरोपी पसार झाले होते. फरार आरोपी शोधार्थ जिल्हा पोलीस अधीक्षक श्रीकृष्ण कोकाटे मार्गदर्शनाखाली आखाडा बाळापूर पोलीस निरीक्षक विष्णुकांत गुट्टे यांनी दोन पथके नियुक्त केली होती. सदर पथक तीन दिवसापासून आरोपी शोधार्थ विविध भागात गेली होती.
१९ ऑक्टोंबर शनिवार रोजी दुपारी आरोपी वारंगा मसाई शिवारात एका शेतात असल्याची माहिती मिळाल्यानंतर पोलीस निरीक्षक विष्णुकांत गुट्टे, सहाय्यक पोलीस निरीक्षक डी.बी. बसवंते, शेख बाबरभाई, शिवाजी पवार, राजेश घोंगडे, विजय जाधव, सरकटे पोलीस पथकाने छापा मारून आठपैकी पाच आरोपी वारंगा मसाई शिवारातील शेत आखाड्यावरून पकडले असल्याचे सहाय्यक पोलीस निरीक्षक डी.बी. बसवंते यांनी सांगितले.
इतर तीन फरार आरोपीचा शोध
सदर खून प्रकरणात आठ जणाविरूद्ध खुनाचा गुन्हा दाखल करण्यात आला होता. सगळे आरोपी घटना घडल्यानंतर फरार होते. शनिवारी दुपारी आठपैकी पाच आरोपी पकडण्यात आले तर तीन महिला आरोपींचा शोध पोलीस पथक घेत असल्याचे पोलीस निरीक्षक विष्णुकांत गुट्टे यांनी सांगितले.
