उबाठा शिवसेनेचे सचिव विनायक राऊत यांनी काढले प्रसिद्ध पत्रक
हिंगोली (Former MP Subhash Wankhede) : लोकसभा मतदार संघातील माजी खासदार सुभाष वानखेडे यांनी पक्ष विरोधी कारवाया केल्याच्या आरोपावरून त्यांची शिवसेना उद्धव बाळासाहेब ठाकरे पक्षातून हकालपट्टी केल्याबाबतचे पत्र शिवसेना मध्यवर्ती कार्यालयातून प्रसिद्ध झाले.
माजी खासदार सुभाष वानखेडे (Former MP Subhash Wankhede) यांनी सन २००९ मध्ये शिवसेनेकडून लोकसभा निवडणूक लढविली होती. त्यावेळी त्यांचा विजय झाला होता. सन २०१४ देशामध्ये पंतप्रधान नरेंद्र मोदी यांची मोठी लाट असताना त्यांचा काँग्रेसकडून पराभव झाला होता. त्यानंतर त्यांनी भाजपात प्रवेश केला होता. भाजपात त्यांचे मन रमले नसल्याने त्यांनी पुन्हा सन २०१९ च्या लोकसभा निवडणुकीत काँग्रेसकडून उमेदवारी लढविली होती. त्यातही त्यांना पराभवाची चव चाखावी लागली. मागील दोन वर्षापूर्वी शिवसेनेत बंडाळी झाली.
त्यावेळी माजी खासदार वानखेडे (Former MP Subhash Wankhede) यांनी काँग्रेसमधून पुन्हा स्वगृही येऊन शिवसेना उबाठामध्ये प्रवेश केला. सध्या विधानसभा निवडणूक सुरू असून विरोधी पक्षाच्या उमेदवाराचा अर्ज भरण्या करीता जाऊन त्यांचा प्रचार करीत असल्याचा आरोप त्यांच्यावर झाल्याने शिवसेना मध्यवर्ती कार्यालयातून उद्धव बाळासाहेब ठाकरे शिवसेनेचे नेते तथा सचिव विनायक राऊत यांनी माजी खासदार सुभाष वानखेडे यांनी पक्ष विरोधी कारवाया केल्यामुळे पक्षप्रमुख उद्धव ठाकरे यांच्या आदेशान्वये त्यांची पक्षातून हकालपट्टी केल्याचे प्रसिद्धी पत्रक काढण्यात आले. ऐन निवडणुकीच्या धामधुमीत माजी खासदार वानखेडे यांची शिवसेना उबाठामधून हकालपट्टी झाल्याने त्यांची पुढील राजकीय भूमिका काय राहणार, याकडे सर्वांचे लक्ष लागले आहे. या संदर्भात वानखेडे (Former MP Subhash Wankhede) यांच्याकडे संपर्क साधण्याचा प्रयत्न केला असता त्याचा मोबाईल ‘नॉटरिचेबल’ होता.
