आरमोरी (Gadchiroli) :- आरमोरी शहरानजीकच्या अरसोडा जंगल परिसरात दोन दिवसापुर्वी अज्ञात युवक – युवतीचा सांगाडा आढळून आला. विशेष म्हणजे मृतकाच्या हातात लहान पंजे आढळून आल्याने कुणाची तरी बालकासह हत्या करून पेटवुन दिले की काय अशी चर्चा सुरू झाली आहे. यामुळे आरमोरी तालुक्यात खळबळ निर्माण झाली आहे.
मृतकाच्या हातात लहान पंजे आढळून आल्याने शंका – कुशंकांना पेव
अरसोडा जंगल परीसरात वाघाचा वावर असल्याने या जंगल परीसरात कुणी फिरकत नाही. दरम्यान अरसोडा येथील सुरज भाऊराव दिघोरे (३५) हे २५ एप्रिल रोजी आपला भाऊ आणि आईसह दुपारी १२.३० वाजताच्या सुमारास अरसोडा जंगल परीसरात कुड्याची फुुले तोडत असतांना जंगलामध्ये एका झाडाखाली २५ वर्षापेक्षा जास्त वयाच्या युवक/युवतीचे प्रेत कुजलेल्या स्थितीत आढळून आले. यामुळे घाबरलेल्या दिघोरे यांनी आरमोरी पोलीस ठाणे गाठून पोलीसांना माहिती दिली. पोलिसांनी लागलीच घटनास्थळ गाठून पाहणी केली असता प्रेत कुजलेल्या तसेच जळालेल्या स्थितीत आढळून आले. तसेच मयताचे तोंडातुन एक दात बाहेर आल्याचे दिसून आले. मृतकाची उंची अंदाजे ०५ फुट ०५ इंच आहे. मृतकाच्या डाव्या पायाजवळ एक लहान आकाराचा हाताचा पंजा व उजव्या हाताच्या पंजामध्ये लहान आकाराचा हाताचा पंजा दिसून आला. पोलिसांनी घटनास्थळावरून आकाशी रंगाचा टी-शर्ट, पिळसर काळ्या रंगाचा गमचा, लेटर पॅडचे हुक, स्मार्ट वॉच, कंपनीचा मोबाईल आदी साहित्य जप्त केले. या घटनेसंदर्भात आरमोरी पोलीस ठाण्यात विविध कलमान्वये गुन्हा (Crime) दाखल करण्यात आला आहे. कुणी बेपत्ता असल्यास आरमोरी पोलीस ठाण्यात कळविण्याचे आवाहन आरमोरी पोलीस ठाण्याचे पोलीस निरीक्षक वैâलास गवते यांनी केले आहे.
