गोंदिया (Gondia Tiger) : बौध्द पौर्णिमेची प्रकाशमय रात्र निसर्गप्रेमींसाठी पर्वणीची ठरली. दरवर्षी प्रमाणे बौध्द पौर्णिमेच्या दिवशी २३ मे रोजी (Nagzira Tiger Reserve) नागझिरा व्याघ्र प्रकल्प परिसरात प्राणी गणना करण्यात आली. दरम्यान गणना करण्यासाठी मचानावर सज्ज असलेल्या वन्यप्रेमी आणि यंत्रणेच्या अधिकार्‍यांना सर्वश्रेणीच्या वन्यप्राण्यांचे दर्शन झाले. नागझिरा व्याघ्र प्रकल्पात १२ वाघासह एकूण १९८५ प्राण्यांची नोंद करण्यात आली आहे. त्यामुळे (Nagzira Tiger Reserve) नागझिरा व्याघ्र प्रकल्प वन्यप्रेमींसाठी आगामी काळात आकर्षणाचा केंद्र राहणार, असाही विश्वास व्यक्त केला जात आहे.
वाघासह सर्ववर्गीय १९८५ प्राण्यांची नोंद
बौध्द पौर्णिमेला चंद्राच्या उजेडात प्राणी गणना केली जाते. त्यानुरूप गुरूवार, २३ मे रोजी सायंकाळी ६ ते सकाळी ६ वाजेपर्यंत नागझिरा अभियारण्य, (Nagzira Tiger Reserve) नागझिरा व्याघ्र प्रकल्पात प्राण्यांची नोंद करण्यासाठी यंत्रणा कामाला लागली होती. दरम्यान पिटेझरी, नागझिरा, उमरझरी, डोंगरगाव, बोंडे, नवेगाव राष्ट्रीय उद्यान, कोका या क्षेत्रात गणना पथक कार्यरत करण्यात आले. या गणना प्रक्रियेत वाघ, बिबट, रानकुत्रा, हरीण, अस्वल, रानडुक्कर, मुंगूस, रानगवे, निलगाय, सांबर, चितळ, वानर, मोर, साळींदर, रानमांजर, उदमांजर, भेटकी, तडस, हळद्या, कोकीळा, सनबर्ड, घार, चौसिंगा, पॅगोलियन, ससा, लाल तोंड्या माकड, गरूड, रानमांजर, रान कोंबडा आदि प्राणी पहावयास मिळाले. एंकदरीत नागझिरा व्याघ्र प्रकल्प बफर झोन परिसरात सर्व वर्गीय १९८५ प्राण्यांची नोंद करण्यात आली. यामुळे (Nagzira Tiger Reserve) नागझिरा व्याघ्रप्रकल्प परिसर वाघांसह इतर वन्यप्राण्यांच्या अधिवासाने समृध्द असल्याचेही समोर आल्याने वन्यप्रेमींमध्ये आनंदाचे वातावरण पहावयास मिळाले.
अशी आहे प्राण्यांची संख्या
वाघ-१२, बिबट-१८, रानकुत्रे -८२, अस्वल -७५, रानडुक्कर-१२८, मुंगूस-६४, रानगवे-७२०, निलगाय,-७१, सांबर-५०, चितळ-११५, हरीण-१६, वानर-३८६, मोर-११६, साळींदर-७, रानमांजर-१, उदमांजर-१०, भेटकी-१६, हळद्या-१, कोकीळा-५, सनबर्ड-१, घार-१, चौसिंगा-३, लाल तोंड्या माकड-८१, गरूड-३, रानमांजर-१, रान कोंबडा-२ याप्रमाणे प्राण्यांची नोंद झाली आहे.
सर्वाधिक प्राणी नागझिरा परिसरात
नागझिरा व्याघ्र प्रकल्पाचा (Nagzira Tiger Reserve) बफर झोन परिसर मोठ्या प्रमाणात व्याप्त आहे. या परिसरात पिटेझरी, नागझिरा, उमरझरी, डोंगरगाव, बोंडे, राष्ट्रीय उद्यान नवेगावबांध व कोका या क्षेत्राचा बफर झोनमध्ये समावेश आहे. नागझिरा बफर झोन परिसरात गणनेसाठी असलेल्या यंत्रणेची चांगलीच पर्वणी झाली. या क्षेत्रात एकूण १९८५ वन्यप्राण्यांच्या नोंदीपैकी तब्बल ६७६ प्राणी याच क्षेत्रात नोंदविण्यात आले. विशेष म्हणजे, या (Gondia Forest) क्षेत्रात १० वाघ व ९ बिबट्यांचा अधिवास असल्याचे समोर आले.
