कारंजा(Washim):- केवळ अर्ध्या तासाच्या फरकात कारंजा – मुर्तीजापुर व कारंजा – शेलुबाजार या मार्गावर दोन अपघाताच्या (Accident) घटना घडल्या. या घटनात ५ जण गंभीर जखमी (seriously injured) झाले. त्यात तीन मजुरांचा समावेश आहे. अपघाताची पहिली घटना १२ जून रोजी रात्री ९ वाजताच्या दरम्यान कारंजा- मुर्तिजापूर मार्गावर खेर्डा फाट्यापासून एक किलोमीटर अंतरावर घडली. या घटनेत रस्ता निर्मिती च्या कामावरील तीन मजूर गंभीर जखमी झाले. संदीप लोखंडे वय १८ वर्ष ,अक्षय इंगळे वय २८ वर्ष व चेतन ढळे वय ३१ वर्ष अशी जखमींची नावे असून, त्यातील दोघेजण कारंजा तालुक्यातील दिघी येथील तर एक जण सोमठाणा येथील रहिवासी आहे.अपघातस्थळी
समोरून येणार्‍या कारने त्यांच्या दुचाकीला जबरदस्त धडक
सूत्रांच्या माहितीनुसार, दुचाकीने जेवणाचा डबा घेण्याकरिता ते खेर्डा फाट्यावर आले होते. तेथून प्लांटवर परतत असताना मार्गातील अपघातस्थळी समोरून येणार्‍या एका कारने त्यांच्या दुचाकीला जबरदस्त धडक (strike)दिली. त्यामुळे ते दुचाकीसह खाली पडून गंभीर जखमी झालेत. अपघाताच्या घटनेची माहिती मिळताच प्लांटवरील वाहनाच्या मदतीने त्यांना उपचारासाठी कारंजा उपजिल्हा रुग्णालयात (hospital) दाखल करण्यात आले आणि तेथील प्राथमिक उपचारानंतर पुढील उपचारासाठी त्यांना अमरावती येथे पाठविण्यात आले. तर अपघाताची दुसरी घटना केवळ २० मिनिटाच्या अंतराने कारंजा -शेलुबाजार मार्गावरील पोघात फाट्याजवळ घडली. या घटनेत एका दुचाकीला समोरून येणार्‍या मारुती कारने जबरदस्त धडक दिली.
दुचाकीवरील दोघेजण गंभीर जखमी
त्यामुळे दुचाकीवरील दोघेजण गंभीर जखमी झाले. शेख जबर शेख युनुस वय ३५ वर्ष रा. पोघात ता. मंगरूळपीर व रामेश्वर गुलाबराव गावंडे वय ४५ वर्ष रा. घोटा ता. मंगरूळपीर अशी जखमींची नावे आहेत. सूत्रांच्या माहितीनुसार दुचाकी वरील जखमी दोघेजण हे कामावरून घरी परतत असताना त्यांना मार्गातील अपघातस्थळी एका मारुती कारने धडक दिली, त्यामुळे ते खाली पडून गंभीर जखमी झाले. अपघाताच्या घटनेनंतर उपचारासाठी त्यांना कारंजा उपजिल्हा रुग्णालयात दाखल करण्यात आले. परंतु उपचारादरम्यान त्यांची प्रकृती गंभीर असल्याचे निदर्शनास आल्याने त्यांना पुढील उपचारासाठी बाहेरगावी जाण्याचा सल्ला रुग्णालय प्रशासनाने दिला. दरम्यान, अपघाताच्या या दोन्ही घटनांच्या पोलिसातील नोंदीबाबत मात्र तपशील प्राप्त झाला नाही.
