हिंगोली (Hingoli) :- जिल्हा शासकीय रुग्णालय परिसरामध्ये कनेरगाव नाका येथील वयोवृध्द महिलेला भांड्याची पेटी फुकट मिळणार आहे. असे आमिष दाखवून तिच्या अंगावरील दागिणे काढून घेऊन पलायन केलेल्या सराईत चोरट्याला स्थानिक गुन्हे शाखेच्या (Local Crime Branch) पथकाने मुद्देमालासह जेरबंद केले.
स्थानिक गुन्हे शाखेच्या पथकाची कामगिरी
१ एप्रिल रोजी कनेरगाव नाका येथील विमल वामन विसावे ही महिला जिल्हा शासकीय रुग्णालयात (Government hospitals) उपचारासाठी आली होती. उपचारा नंतर रुग्णालय परिसरात उभी असताना एका अनोळखी भामट्याने तिच्या जवळ येऊन वयोवृध्द महिलेची विचारपूस केल्यानंतर तुम्हाला भांड्याची पेटी मिळाली आहे किंवा नाही याची विचारपुस केली असता विमलबाईने मिळाली नसल्याचे सांगितले. यावेळी सदर भामट्याने तिला भांड्याची पेटी फुकट मिळणार आहे. परंतु तुमच्या अंगावरील दागिणे पाहुन ती देता येणार नाही, असे सांगुन वयोवृध्द महिलेस तिच्या मुलीस आडोशाला नेऊन महिलेच्या अंगावरील दागिणे काढून घेतले होते. त्यानंतर त्याने पलायन केले होते.
एकुण १ लाख ३० हजार रुपयाचा ऐवज जप्त
या संदर्भात हिंगोली शहर पोलिसात गुन्हा दाखल झाला होता. स्थानिक गुन्हे शाखेचे पथक भामट्याचा शोध घेत असताना रेकॉर्डवरील गुन्हेगार नागोराव सुखदेव श्रिरामे रा. हनकदरी ता.सेनगाव हा असल्याचे निष्पन्न होताच पथकाने सापळा लावून हिंगोली शहरातून त्याला ताब्यात घेतले. पोलिसी खाक्या दाखवल्यानंतर त्याने गुन्ह्याची कबुली देऊन महिलेच्या अंगावरील जबरीने लुटलेले ५४ तोळे चांदीचे दंडकडे, पाटल्या, काकणे व ७ ग्रॅमची सोन्याची पोथ असा एकुण १ लाख ३० हजार रुपयाचा ऐवज जप्त करून नागोराव श्रीरामे याला अटक करण्यात आली. ही कारवाई पोलिस अधिक्षक श्रीकृष्ण कोकाटे, अप्पर पोलिस अधिक्षक अर्चना पाटील, स्थानिक गुन्हे शाखेचे पोलिस निरीक्षक विकास पाटील यांच्या मार्गदर्शनाखाली सहाय्यक पोलिस निरीक्षक शिवसांब घेवारे, पोलिस उपनिरीक्षक विक्रम विठुबोणे, प्रेम चव्हाण, लिंबाजी वाव्हळे, राजू ठाकुर, किशोर सावंत, विशाल खंडागळे, आकाश टापरे, दत्ता नागरे, रवि स्वामी यांनी केली आहे.
सराईत गुन्हेगारावर यापूर्वी अनेक गंभीर गुन्हे दाखल
हनकदरी येथील नागोराव सुखदेव श्रीरामे हा सराईत गुन्हेगार असुन अनेक वयोवृध्द महिलांना गाठून वेगवेगळे बहाणे सांगुन अनेकवेळा जबरी चोरी केली आहे. तळणी येथील शेतामध्ये एका वयोवृध्द महिलेचा खुन करून तिचे दागिणे जबरीने चोरून नेले होते. तसेच यापूर्वी पोलिस भरती पुर्व प्रशिक्षण केंद्र चालवित असल्याने आरोपीने भरतीपुर्व प्रशिक्षणार्थींची फसवणूक करून पैसे लुबाडले आहेत. तसेच अनेक वेळा घरफोडी केल्याचे गुन्हेही दाखल आहेत. त्यामुळे या सराईत गुन्हेगारावर एमपीडीए कारवाई देखील करण्यात आली होती. मागील पंधरा दिवसापूर्वीच त्याची कारागृहातून सुटका झाली होती. त्यामुळे नागरीकांनी हा सराईत गुन्हेगार आपल्या भागात आल्यास विशेषत: महिलांनी सतर्क राहण्याबाबतचे आवाहन पोलिसांनी केले आहे.
