लातूरच्या पहिल्याच सार्वजनिक कार्यक्रमात पालकमंत्री शिवेंद्रराजे यांची ग्वाही…
लातूर (Latur) : भाजपा नेते तथा माजी आ. शिवाजीराव पाटील कव्हेकर (Shivajirao Patil Kavekar) साहेबांनी माझे वडील तत्कालीन मंत्री अभयसिंहराजे भोसले (Abhay Singh Raje Bhosale) यांच्यासोबत काम केले आहे. त्यामुळे त्यांच्याविषयी वडीलकीचा आदर माझ्याही मनी कायम राहणार आहे. त्यामुळे या पाच वर्षांच्या कालावधीमध्ये अधिकारांने माझ्याकडून कामे करून घ्या, असे सांगतानाच आपल्या अनुभवाची मदत घेऊन विकासाला गती देऊ, लातूरला पुन्हा गतवैभव मिळवून देऊ, अशी ग्वाही लातूरचे पालकमंत्री छत्रपती शिवेंद्रराजे भोसले यांनी दिली.
जेएसपीएमच्या महाराष्ट्र कॉलेज ऑफ नर्सिंग महाविद्यालय इमारतीचे भूमिपूजन!
भाजपा नेते तथा किसान मोर्चा गुजरात व गोवा राज्याचे प्रभारी माजी आ. शिवाजीराव पाटील कव्हेकर यांच्या जेएसपीएम संस्था (JSPM Institute) संचालित महाराष्ट्र कॉलेज ऑफ नर्सिंग महाविद्यालयाच्या (Nursing College) भव्य इमारत भूमिपूजन सोहळ्यात ते बोलत होते. या कार्यक्रमाला भाजपा नेते माजी आ.शिवाजीराव पाटील कव्हेकर, जिल्हा परिषदेच्या माजी अध्यक्षा सौ. प्रतिभाताई पाटील कव्हेकर, जेएसपीएमचे उपाध्यक्ष तथा भाजपा युवा मोर्चाचे प्रदेश उपाध्यक्ष अजितसिंह पाटील कव्हेकर, जिल्हाध्यक्ष दिलीपराव देशमुख, जेएसपीएमचे कार्यकारी संचालक रंजितसिंह पाटील कव्हेकर, जेएसपीएमचे समन्वयक संचालक निळकंठराव पवार, भाजपाचे जिल्हा उपाध्यक्ष सूर्यकांतराव शेळके, भाजपा महिला आघाडीच्या शहर जिल्हाध्यक्षा रागिणीताई यादव, प्राचार्य आर.एस.अवस्थी, नर्सिंगच्या प्राचार्या सिरीन सॅमसन, प्रताप शिंदे, पतंजलीचे महाराष्ट्र प्रभारी विष्णू भूतडा, प्राचार्य गोविंद शिंदे, प्राचार्य मारुती सूर्यवंशी आदी मान्यवर उपस्थित होते.
महाराष्ट्र कॉलेज ऑफ नर्सिंग कॉलेजच्या इमारतीचे भूमिपूजन झाले, असे त्यांनी जाहीर केले. लातूरचा पालकमंत्री म्हणून राज्याचे मुख्यमंत्री देवेंद्र फडणवीस (CM Devendra Fadnavis) यांनी माझ्यावर जबाबदारी सोपविली आहे. त्यामुळे शहरातील पाणी प्रश्‍न, कचरा यासह सर्व प्रश्‍न मार्गी लावण्याचे काम करू. लातूर शहराच्या सर्वांगिण विकासाच्या दृष्टीने जे-जे चांगले करता येईल, ते करून लातूर शहराचे गतवैभव पुन्हा मिळवून देण्याचे एकजुटीने काम करू, अशी ग्वाही पालकमंत्री ना. शिवेंद्रराजे यांनी दिली.
लातूर भाजपाचा बालेकिल्‍ला!
लातूर जिल्ह्यामध्ये सहा पैकी पाच आमदार महायुतीचे आहेत. त्यामुळे लातूर भाजपाचा बालेकिल्‍ला म्हटले तर ते वावगे ठरणार नाही. आपल्या कालावधीत शासकीय दवाखान्याचा (Government Hospital) प्रश्‍न मार्गी लावू. याबरोबरच पाण्याचाही विषय महत्त्वाचा आहे. पाणी प्रश्‍नाबाबत सगळीकडे वादाचा विषय होतो. त्यामुळे यावर आता काही बोलणार नाही. परंतु याबाबत माहिती घेऊन त्याबाबतही काही करता येईल का ते आपण येणार्‍या काळात पाहू. असा विश्‍वासही त्यांनी यावेळी बोलताना व्यक्‍त केला.
भोसले आणि कव्हेकर परिवाराचे ऋणानुबंध कायम!
आज माजी मंत्री अभयसिंह राजे भोसले यांचे चिरंजीव शिवेंद्रसिंह राजे भोसले यांचे आगमन लातूर शहरात झाल्यामुळे सगळीकडे नवचैतन्य निर्माण झाले आहे. भोसले परिवाराचे आणि कव्हेकर परिवाराचे ऋणानुबंध कायम आहेत. मी युवक काँग्रेसचा (Congress) प्रदेश उपाध्यक्ष होतो. त्यावेळी तत्कालीन मंत्री अभयसिंह राजे भोसले हे काहीवेळा लातूरला आले होते. ते ऋणानुबंध कायम ठेवण्याचे काम त्यांचे चिरंजीव छत्रपती शिवेंद्रराजे भोसले यांच्या माध्यमातून होत आहे, असे गौरवोद्गार माजी आ. शिवाजीराव पाटील कव्हेकर यांनी यावेळी काढले.
