छत्रपती संभाजीनगर (Latur MP Dr. Shivaji Kalge) : लातूरचे खासदार डाॅ. शिवाजी काळगे (Dr. Shivaji Kalge) यांच्याविरुद्ध जात प्रमाणपत्रावरून दाखल करण्यात आलेल्या दोन्ही याचिका मुंबई उच्च न्यायालयाच्या आैरंगाबाद खंडपीठाचे न्या. अरुण पेडणेकर यांनी मंगळवारी फेटाळल्या. याचिकेत उपस्थित केलेले मुद्दे निवडणूक याचिकेचे मुद्दे असू शकत नाही, असे न्यायालयाने याचिका फेटाळताना म्हटले.
लातूर लोकसभा मतदार संघातून निवडणुकीतील वंचित आघाडीचे उमेदवार नरसिंग उदगीरकर आणि नगरसेवक आल्टे व इतरांनी याचिका दाखल केल्या होत्या. डाॅ. काळगे यांना सक्षम अधिकाऱ्यांनी जातीचे प्रमाणपत्र दिले होते. तसेच जात पडताळणी समितीसारख्या सक्षम प्राधिकरणाने जात वैधता प्रमाणपत्र दिले होते. याबाबी खंडपीठाने मुख्यत: ग्राह्य धरल्या. तसेच डाॅ. काळगे (Dr. Shivaji Kalge) यांना सक्षम अधिकाऱ्यांनी जातीचे प्रमाणपत्र दिले नव्हते व सक्षम प्राधिकरणाने वैधता प्रमाणपत्र दिले नव्हते, हे सिद्ध करणारा कोणताही पुरावा याचिकाकर्त्यांनी निवडणूक याचिकेसोबत जोडला नाही. त्यांनी याचिकेत उपस्थित केलेले मुद्दे निवडणूक याचिकेचे मुद्दे असू शकत नाहीत.
वंचित बहुजन आघाडीचे नेते नरसिंग उदगीरकर यांनी डाॅ. काळगेंविरोधात (Dr. Shivaji Kalge) निवडणूक लढवली होती. त्यात उदगीरकर हे पराभूत झाले होते. त्यांनी याचिकेत आरोप केले होते की, खासदार काळगे यांनी त्यांच्या गावाच्या प्राथमिक शाळेच्या निर्गम उताऱ्यात खाडाखोड करून स्वत:ची मूळ जात हिंदू जंगमऐवजी जंगम माला करून घेतले आणि निलंगा येथील विभागीय अधिकाऱ्यांकडून माला जंगम जातीचे प्रमाणपत्र प्राप्त केले.
