धाराशिव (Latur) :- श्रीक्षेत्र तेर येथील श्री संत शिरोमणी गोरोबाकाका मंदिराच्या महाद्वाराचे काम पूर्व दिशेलाच करावे, या मागणीसाठी कुंभार समाजाचे नेते तथा तेरचे माजी सरपंच महादेव खटावकर यांनी धाराशिवच्या जिल्हाधिकारी कार्यालयासमोर बुधवारी (दि.२ एप्रिल) सुरू केलेले उपोषण आमदार (MLA) कैलास पाटील यांच्या यशस्वी मध्यस्थीनंतर व प्रशासनाने दिलेल्या आश्वासनानंतर शुक्रवारी (दि.४ एप्रिल) मागे घेण्यात आले. राज्यातील कुंभार समाजाच्या संघटनांचे प्रतिनिधी ही यावेळी उपस्थित होते.
प्रशासनाच्या लेखी आश्वासनानंतर खटावकरांचे उपोषण मागे
वास्तूशास्त्राचा आधार न घेता तेर येथील श्री संत शिरोमणी गोरोबाकाका मंदिराच्या प्रस्तावित महाद्वाराचे काम चुकीच्या दिशेला केले जात आहे. पूर्व परंपरागत तेरे येथील श्री संत गोरोबाकाका मंदिराचे महाद्वार हे पूर्वेच्या दिशेलाच आहे. मात्र राज्य शासनाच्या वतीने या मंदिराचे (Temple) बांधकाम करताना महाद्वार चुकीच्या दिशेने उभारले जात आहे. यास तमाम भाविक भक्तांनी, वारकऱ्यांनी, ग्रामस्थांनी व राज्यातील कुंभार समाज बांधवांनी विरोध दर्शविला आहे. या मंदिराचे महाद्वार पूर्वेसच व्हावे, या मागणीसाठी तेरचे माजी सरपंच तथा कुंभार समाजाचे नेते महादेव खटावकर व वारकऱ्यांनी धाराशिवच्या जिल्हाधिकारी कार्यालयासमोर बुधवारपासून आमरण उपोषण सुरू केले होते. शुक्रवारी, दिनांक ४ एप्रिल २०२५ रोजी या उपोषण स्थळी कळंबचे आमदार कैलास पाटील यांनी भेट देत जिल्हाधिकाऱ्यांशी चर्चा केली. तसेच कुंभार समाजाच्या प्रमुख नेते व पदाधिकाऱ्यांनी खटावकर यांची भेट घेऊन चर्चा केली.
शिव मंदिराचे मुख्य प्रवेशद्वार हे पूर्वेला करू, असे लेखी पत्र
या संदर्भात जिल्हाधिकाऱ्यांशी चर्चा केली असता येत्या सोमवारी सर्व संबंधितांची आपण बैठक घेऊन सकारात्मक निर्णय घेऊ, असे आश्वासन जिल्हाधिकाऱ्यांनी दिले. सार्वजनिक बांधकाम विभागाच्या कार्यकारी अभियंत्यांनी तेरा येथील श्री संत गोरोबाकाका व शिव मंदिराचे मुख्य प्रवेशद्वार हे पूर्वेला करू, असे लेखी पत्र दिले. या आश्वासानंतर महादेव खटावकर यांना उपोषण आमदार कैलासदादा पाटील, कुंभार समाजाचे नेते सतीश दरेकर, प्रदेश अध्यक्ष रमाकांत क्षीरसागर यांच्या हस्ते नारळ पाणी देऊन आमरण उपोषण मागे घेण्यात आले. याप्रसंगी भाविक भक्त, वारकरी, तेर ग्रामस्थ व कुंभार समाज बांधव मोठ्या संख्येने उपस्थित होते.
