Latur :- शेतकऱ्यांना सरसकट पीकविमा द्यावा, शेतकऱ्यांच्या शेतमालाला भाव द्यावा आणि शेतकऱ्यांना कर्जमुक्ती द्यावी या प्रमुख मागण्यांसाठी बैलगाड्या (bullock carts) रस्त्यावर सोडून शिवसेना उद्धव बाळासाहेब ठाकरे (Uddhav Balasaheb Thackeray) पक्षाच्या वतीने मंगळवारी जिल्ह्यातील लोदगा (ता.औसा) येथे रास्ता रोको आंदोलन करण्यात आले.
सर्व शेतकऱ्यांना सरसकट पीकविमा द्यावा
शिवसेनेचे जिल्हाप्रमुख संतोष सोमवंशी व युवा सेना जिल्हाप्रमुख दिनेश जावळे यांच्या नेतृत्वाखाली शेतकऱ्यांच्या विविध मागण्यांसाठी लोदगा येथील छत्रपती शिवाजी महाराज चौकात जवळपास तासभर हे आंदोलन झाले. 2022-23 पासून विमा कंपनीकडे (Insurance company) पीकविमा भरूनही शेतकऱ्यांना पीकविम्याचा लाभ मिळत नाही. सध्या शेतकऱ्यांच्या खात्यावर ऑनलाईन पीकविमा टाकला असला तरी 90 टक्के शेतकऱ्यांच्या खात्यावर पीकविमा रक्कम पडली नाही, हे 90 टक्के शेतकरी पीकविम्यापासून वंचित आहेत. त्या सर्व शेतकऱ्यांना सरसकट पीकविमा द्यावा, अशी मागणी यावेळी करण्यात आली. या आंदोलनात शिवसेना जिल्हाप्रमुख संतोष सोमवंशी, युवा सेना जिल्हाप्रमुख दिनेश जावळे, शेतकरी सेना जिल्हाध्यक्ष विलास लंगर, उपतालुकाप्रमुख चंद्रकांत तळेगावे, सर्कल प्रमुख श्रीहरी काळे, स्वरुप डिग्रसे, ज्ञानेश्वर उजळंबे, हणमंत करळे, सुनील खंडागळे, विवेक जाधव, अजीत काळे, नेताजी भोईबार, नवनाथ लांडगे, सचिन उजळंबे, मुकेश पारवे, स्वरूप काळे राम मुकदम, धम्मपाल गायकवाड यांच्यासह शिवसैनिक व शेतकरी मोठ्या संख्येने सहभागी झाले होते.
