महसूल व वन विभागांचे दुर्लक्ष !
मानोरा (Minor Mineral Theft) : मानोरा तालुका हा अति दुर्गम व डोंगराळ भागात असल्याची शासन दप्तरी नोंद असुन तालुक्यातील गावरान जमीन, डोंगराळ भाग या परिसरात मोठ्या प्रमाणावर गौन खनिज साठा आहे. हा गौण खनिज साठा उत्खनन करून वाहतूक करावयाचा असेल तर महसूल व वन विभागाकडून कायदेशीर परवानगी घेऊन त्याची राँयल्टी रितसर काढावी लागते, मात्र महसूल व वन विभागाच्या नाकांवर टिंच्चून मानोरा तालुक्यात मोठ्ठ्या प्रमाणावर ट्रॅक्टर व टिप्परच्या माध्यमातून गौण खनिजाची चोरी होत असतांना संबंधीत प्रशासन गप्प का ? असा प्रश्न निसर्ग पर्यावरण प्रेमीकडून केल्या जात आहेत.
डोंगराचे संवर्धन करणे व गौणखनिज साठा जपणे, त्याच बरोबर गायरान क्षेत्र चांगल्या स्थितीत ठेवणे हे प्रशासनाचे काम आहे. त्याची कोणी चोरी करित असेल तर स्थानीक कर्मचारी व त्या भागात नेमणूक केलेल्या कर्मचाऱ्यांकडून त्याची माहिती वरिष्ठ अधिकाऱ्यांना देऊन राँयली बुडविणाऱ्यांवर कारवाई करणे हे महसूल विभागाचे काम आहे. पण गेल्या काही महीन्यांपासून मानोरा तालुक्यात विवीध गावात या गौणखनिजाची दिवसाढवळ्या सर्रास चोरी केली जात आहे. ते ही महसूल व वन विभागाच्या नाकांवर टिच्चून या चोरीतून डोंगराचे संवर्धन होत नसून डोंगरच्या डोंगर पोखरले जात आहेत, तर गायरान जमीनी मोठ्या प्रमाणावर खोदल्या जात आहेत. मग यावर अंकुश ठेवणारे प्रशासन झोपा काढते की काय ? असा प्रश्न गाव गावच्या सर्व सामान्य नागरिकांतून बोलल्या जात आहे. याकडे महसूल व वन विभाग प्रशासनाने लक्ष द्यावे अशी मागणी नागरिकांकडून केली जात आहेत.
गौणखनिज चोरीने शासन महसुलाला फटका
तालुक्यात ठिकठिकाणच्या गावातून राँयल्टी न भरता मोठ्या प्रमाणावर गौणखनिज चोरी होत असल्याने यातून मिळणारा शासनाच्या लाखो रुपयाच्या महसूलला चुना लागत असल्याचे दिसून येत आहे. याबाबत महसूल व वन विभागाने सतर्क राहून गौण खनिज चोरी करणाऱ्यांवर धडक मोहीम हाती घेण्यात यावी, अशी मागणी निसर्गप्रेमी नागरिकांतून केली जात आहे. तालुक्यात शेंदूरजना, भिलडोंगर, रूई – गोसता , रतनवाडी, आसोला (खुर्द), आमदरी, आदी भाग डोंगराळ असल्याने गौण खनिज मोठ्या प्रमाणात उत्खनन केल्या जात आहे. महसूल विभागाचे अधिकारी, कर्मचारी यांनी लक्ष केंद्रीत करण्याची मागणी होत आहे.
