साकोली तालुक्यातील सिरेगाव टोला येथील घटना
देशोन्नती वृत्तसंकलन
सेंदूरवाफा/कोरेगाव, चोप (Mobile Explosion) : साकोली तालुक्यातील सानगडीनजीक असलेल्या सिरेगाव टोला येथे मोटारसायकलवर जातांना पाॅकेटमध्ये मोबाईलचा स्फोट होऊन एका मुख्याध्यापकाचा दुर्दैवी मृत्यू तर एक जण गाडीवरून पडून गंभीर जखमी झाल्याची हृदयद्रावक घटना दि.६ डिसेंबर २०२४ रोज शुक्रवारला सायंकाळी ७ वाजताच्या दरम्यान उघडकीस आली आहे. सुरेश भिकाजी संग्रामे वय ५४ रा.सिरेगाव टोला असे मृत मुख्याध्यापकाचे नाव असून नत्थू गायकवाड हे जखमी व्यक्तीचे नाव आहे.
सविस्तर असे की, सुरेश संग्रामे हे आपले जवळचे नातेवाईक नत्थू गायकवाड यांचे सोबत नातेवाईकांकडे किटाडी येथे जेवण करायला सिरेगाव/टोला येथून मोटारसायकलने घरून निघाले असता काही अंतरावर सिरेगाव-सानगडी मार्गावरील केसलवाडा फाट्यावर सुरेश संग्रामे यांच्या वरच्या खिशात असलेल्या मोबाईल फोनचा अचानक स्फोट होऊन कपड्याला आग लागली. त्या आगीत त्यांचे शरीर भाजले. लगेच त्यांना उपचारा करिता हलविले असता त्यांचा वाटेतच मृत्यू झाला असून सोबत मागे बसलेले नत्थू गायकवाड हे गाडीवरून पडल्याने ते गंभीर जखमी झाले असून त्यांना भंडारा येथील लक्ष हॉस्पिटल मध्ये उपचाराकरीता दाखल करण्यात आले आहे.
मृतक सुरेश भिकाजी संग्रामे हे गडचिरोली जिल्हा परिषदेच्या देसाईगंज/ वडसा पंचायत समिती अंतर्गत येणाऱ्या जिल्हा परिषद उच्च प्राथमिक शाळा कसारी येथे मुख्याध्यापक पदावर कार्यरत होते. त्यांच्या मृत्यूपश्चात पत्नी, दोन मुले, सून, एक मुलगी असा बराच मोठा आप्तपरिवार आहे. त्यांच्या पार्थिवावर दि.७ डिसेंबर रोजी दु. १२ वाजता सिरेगाव येथील स्मशानभूमीत अंत्यसंस्कार करण्यात आले. त्यांचा मोबाईल फोनच्या स्फोटात दुर्दैवी मृत्यू झाल्याने गावात हळहळ व्यक्त करण्यात आहे.
