आपत्ती व्यवस्थापन म्हणते, भूकंपाची कोणतीही नोंद नाही
औसा (Ausa taluka) : औसा तालुक्यात गुरुवारी सकाळी 11 वाजेच्या सुमारास मोठा गूढ आवाज आला. औसा तालुक्यातील सारणी, हसलगनn मातोळा, गुबाळ, मंगरुळ, नांदुर्गा या भागात तर लोहारा तालुक्यातील माकणी, कास्ती खु., कास्ती बु., सास्तूर या भागात हा आवाज आल्याचे ग्रामस्थांचे म्हणणे आहे दरम्यान लातूरच्या आपत्ती व्यवस्थापन विभागाने याबाबत प्रसिद्धी पत्र काढत दिल्ली येथील राष्ट्रीय भूकंपमापन केंद्राचा हवाला देत औसा तालुक्यात कुठेही भूकंपाची नोंद झाली नसल्याचे म्हटले आहे.
गुरुवारी सकाळी औसा तालुक्यातील (Ausa taluka) गुबाळ परिसरात मोठा आवाज झाला. सारणी, माकणी, मातोळा या भागातही ग्रामस्थांच्या कानी हा आवाज आला. किल्लारी, सास्तूर हा औसा, लोहारा व उमरगा या तीन तालुक्यांचा मध्यवर्ती भाग आहे. या भागात 1993 ला मोठा भूकंप झाल्यानंतर भूकंपाचे धक्के अनेक वर्षे अधूनमधून जाणवत राहिले. या धक्क्यांमुळे भूकंपग्रस्त भागात सातत्याने घबराटीचे वातावरण निर्माण होते. मात्र गुबाळसह परिसरात गुरुवारी मोठा आवाज आला. हा आवाज नेमका कुठून आला? याचे गूढ मात्र काही उकलले नाही. कदाचित विहिरीत खोदण्यासाठी स्फोट घेतला असला तरी त्याचा आवाज शिवाराच्या पलीकडे जात नाही. मात्र गुरुवारी सकाळी 11 च्या सुमारास झालेला हा आवाज केवळ गुबाळ, सारणीच नव्हे, तर कास्ती माकणी, सास्तूर, मंगरूळ आदी भागात ग्रामस्थांच्या कानी आल्याचे ग्रामस्थ सांगत आहेत. या आवाजासोबत हादरले नाही, अशी पुस्तीही ग्रामस्थांनी जोडली.
प्रशासनाचा एकही अधिकारी गावात पोहोचला नाही
औसा तालुक्यातील (Ausa taluka) गुबाळ, नांदुर्गा , मंगरूळ, सास्तूर परिसरात भूगर्भातून एक मोठा आवाज आल्याने नागरिकांमध्ये भीतीच वातावरण पसरले आहे. भूकंपाचे सौम्य धक्के देखील जाणवल्याचे गावांतील नागरिक सांगत आहेत. या आवाजाने नागरीक भयभीत झाले आहेत. हातातल्या वस्तू जिथल्या तिथे टाकत लोकांनी घरातून बाहेर पळ काढला आहे. या भूगर्भातून आलेल्या आवाजाची माहिती आता प्रशासनाकडे देण्यात आली आहे. मात्र अद्याप प्रशासनाचा एकही अधिकारी गावात पोहोचला नाही.
औसा तालुक्यात भूकंपाची नोंद नाही; नागरिकांनी घाबरू नये!
लातूर : औसा तालुक्यातील (Ausa taluka) गुबाळ, नांदुर्गा परिसरात भूगर्भातून आवाज आल्याबाबत माहिती प्राप्त झाल्यानंतर नवी दिल्ली येथील राष्ट्रीय भूकंपमापन केंद्राकडे चौकशी करण्यात आली आहे. त्यानुसार या परिसरात भूकंपाची कोणतीही नोंद झालेली नाही. त्यामुळे नागरिकांनी घाबरू नये, असे आवाहन लातूर जिल्हा आपत्ती व्यवस्थापन प्राधिकरणमार्फत करण्यात आले आहे.
औसा तालुक्यातील गुबाळ, नांदुर्गा परिसरात भूकंपाची नोंद झालेली नाही. तसेच औशाचे तहसीलदार यांनी दिलेल्या माहितीप्रमाणे या परिसरात कोणतेही नुकसान झालेले नाही. भूकंपाची नोंद नसल्यामुळे नागरिकांनी घाबरून जावू नये, असे आवाहन जिल्हा आपत्ती व्यवस्थापन प्राधिकरणच्यावतीने करण्यात आले आहे.
