परभणी/गंगाखेड(Parbhani):- संभाजीनगर येथे रुग्णालयात जातो म्हणून घराबाहेर पडलेल्या तरुणाचा मृतदेह (Dead-body)बुधवार २७ नोव्हेंबर रोजी गोदावरी नदी पात्रात आढळल्याने खळबळ उडाली आहे. याप्रकरणी गंगाखेड पोलीस ठाण्यात अकस्मात मृत्युची नोंद करण्यात आली आहे.
शहरातील गोदावरी नदी पात्रात मृतदेह तरंगत असल्याची माहिती
याबाबत समजलेली अधिक माहिती अशी की ज्ञानेश्वर देविदास भोसले वय २७ वर्ष रा. मुळी ता. गंगाखेड ह.मु. गोपा हा तरुण संभाजीनगर येथे रुग्णालयात (hospital)जातो म्हणून सोमवार दि. २५ नोव्हेंबर रोजी सकाळी १०:३० वाजता घराबाहेर पडला. तो परत आला नाही व त्याचा मोबाईल ही बंद येत असल्यामुळे त्याच्या नातेवाईकांनी शोध सुरु केला. बुधवार दि. २७ नोव्हेंबर रोजी दुपारी ४ वाजेच्या सुमारास गंगाखेड शहरातील गोदावरी नदी पात्रात मृतदेह तरंगत असल्याची माहिती मिळाल्याने पोलीस उपनिरीक्षक विशाल बुधोडकर, पो.उप.नि. राहुल लोखंडे, पोशि. चंद्रशेखर कावळे आदींनी गोदावरी नदी काठावर धाव घेत अमजद खान पठाण, जहरोद्दीन शेख, शेख मज्जू, शेख इम्रान आदींच्या मदतीने पाण्यातील मृतदेह बाहेर काढून उपजिल्हा रुग्णालयात दाखल केला.
ही माहिती समजल्याने ज्ञानेश्वर भोसले याच्या नातेवाईकांनी गोदावरी नदी(Godawari River) पात्रात मिळालेल्या मृतदेहाची पाहणी केली असता तो मृतदेह ज्ञानेश्वर देविदास भोसले याचाच असल्याचे दिसून आले. याप्रकरणी मयत तरुणाचे मामा देविदास विश्वनाथ कदम वय ५० वर्ष रा. गोपा यांनी दिलेल्या खबरीवरून गंगाखेड पोलीस ठाण्यात अकस्मात मृत्युची नोंद करण्यात आली आहे. याचा पुढील तपास जमादार शंकर रेंगे हे करीत आहेत.
