प्रेम विवाहाला विरोध; पालकांनी संपविले मुलीला

पालम (parbhani):- परभणी जिल्ह्यातील पालम तालुक्यामधील नाव्हा या गावात ऑनर किलींगचा(Honor killing) प्रकार उघडकीस आला आहे. पालकांनी प्रेम विवाहाला विरोध करत पोटच्या मुलीला जीवे मारण्याच्या उद्देशाने ठार करून भावकीतील निवडक व्यक्तींना सोबत घेत मृतदेह(dead body) जाळून पुरावा नष्ट केला. सदर प्रकार उघडकीस आल्यानंतर एकूण आठ जणांवर खून, पुरावा नष्ट करणे या कलमाखाली पालम पोलीसात ३ मे रोजी गुन्हा नोंद झाला आहे.

१९ वर्षीय युवतीचे गावातील दुसर्‍या जातीतील युवकासोबत प्रेम संबंध

या घटनेबाबत अधिक माहिती अशी की, पालम तालुक्यातील नाव्हा येथील १९ वर्षीय युवतीचे गावातील दुसर्‍या जातीतील युवकासोबत प्रेम संबंध(love relationship) होते. मुलीने आंतरजातीय विवाह(Intercaste marriage) करू नये म्हणून पालकांनी विरोध केला. तरी देखील तरुणी लग्न करण्यावर ठाम होती. २१ एप्रिल २०२४ रोजी रात्री १० ते २२ एप्रिलच्या पहाटे दरम्यान नाव्हा येथे तरुणीच्या आई वडीलांनी जीवे मारण्याच्या उद्देशाने तरुणीला ठार केले. त्याच रात्री कोणालाही थांगपत्ता लागू न देता भावकीतील निवडक व्यक्तींना सोबत घेऊन संगनमत करत तरुणीचा मृतदेह नाव्हा येथील स्मशानभूमित जाळून पुरावा नष्ट केला.

सदर घटना पुढे आल्यानंतर पालम पोलीसात पोनि. रावसाहेब गाडेवाड यांनी दिलेल्या फिर्यादीवरून मृत  तरुणीचे आई वडील आणि भावकीतील इतर सहाजण अशा एकूण आठ जणांवर पालम पोलीसात खूनाचा गुन्हा दाखल झाला आहे. पुढील तपास उपविभागीय पोलीस अधिकारी डॉ.समाधान पाटील करत आहेत.