हिंगणघाट (Hinganghat) :- पोलिसांनी ड्रग्ज (Drugs) तस्कराला बेड्या ठोकल्या. पोलिसांनी दोन जणांना अटक करत एमडी ड्रग्जसह एक लाख आठ हजारांचा मुद्देमाल जप्त केला. ही कारवाई हिंगणघाट पोलिस ठाण्याच्या गुन्हे शोध पथकाने केली.
पोलिसांकडून एमडी ड्रग्ज नावाचा अमली पदार्थ जप्त
पोलिसांनी मिळालेल्या माहितीवरून, रिमडोह शिवारात नॅशनल हायवे क्रमांक ४४ वर नाकेबंदी केली. खबरेप्रमाणे एका मोटरसायकल वर एक जण जामकडून सर्व्हीस रोडने येताना दिसून आला. पोलिसांनी सदर मोटरसायकल चालकास पंचासमक्ष सापळा रचून सदर व्यक्तीस ताब्यात घेतले. विचारपूस केली असता त्याने निखिल अशोकराव भोकरे (वय २०) व त्याच्या सोबत असलेल्या व्यक्तीने आकाश उर्फ लल्ला धनराज शिंदे (वय ३४) दोन्ही रा. संत चोखोबा वॉर्ड, हिंगणघाट. जि. वर्धा असे नाव सांगितले. पंचासमक्ष त्यांची अंगझडती घेण्यात आली. त्यामध्ये मोटरसायकल चालक निखिल अशोकराव भोकरे याच्याजवळ प्लॅस्टीकच्या पन्नीमध्ये मॅफेड्रान (Mephedran) नावाचा मनोव्यापारावर परिणाम करणारा पदार्थ मिळाला. पोलिसांनी एमडी ड्रग्ज वजन ६.५५ ग्रॅम (किंमत १८, ३९० रुपये) तसेच मोटारसायकल असता १ लाख ८ हजार ३९० रुपयांचा माल मिळून आला. पोलिसांनी एमडी ड्रग्ज नावाचा अमली पदार्थ जप्त करून एनडीपीएस (NDPS) कायद्यान्वये दोन्ही आरोपींवर गुन्हा नोंद करण्यात आला.
ही कारवाई पोलीस अधीक्षक अनुराग जैन, अप्पर पोलीस अधीक्षक डॉ. सागरकुमार कवडे, उपविभागीय पोलीस अधिकारी रोशन पंडीत यांच्या निर्देशानुसार पोलिस निरीक्षक देवेंद्र ठाकूर यांच्या आदेशाने पोलीस स्टेशन हिंगणघाट येथील सहायक पोलिस निरीक्षक अनिल आळंदे यांच्या प्रत्यक्ष मार्गदर्शनात गुन्हे शोध पथकाचे पोलीस हवालदार प्रशांत ठोंबरे, राहुल साठे, आशिष नेवारे, मंगेश वाघमारे, सायबर शाखेचे अनुप कावळे, गोविंद मुंडे यांनी केली. पुढील तपास हिंगणघाट पोलीस करत आहे.