अर्जुनी मोर (Raksha Bandhan) : पोलीस विभागाबद्दल जनसामान्यांच्या मनात आदराचे स्थान आहे. पोलीस प्रशासन समाजातील न्याय व सुव्यवस्था कायम राखण्यात महत्त्वाची भूमिका बजावतो. याचाच भाग म्हणून पोलीस विभागातील कर्मचाऱ्यांना सरस्वती कनिष्ठ महाविद्यालयाच्या राष्ट्रीय सेवा योजना पथकाद्वारे (Raksha Bandhan) रक्षाबंधनाचा कार्यक्रम नुकताच आयोजित करण्यात आला होता. याकरिता शाळेचे प्राचार्य जे. डी. पठाण, उप प्राचार्य छाया घाटे व पर्यवेक्षक महेश पालीवाल यांचे मार्गदर्शन लाभले.
स्थानिक सरस्वती विद्यालय व कनिष्ठ महाविद्यालयाच्या वतीने पोलीस स्टेशन अर्जुनी मोरगाव येथे राष्ट्रीय सेवा योजना पथकाच्या विद्यार्थिनींद्वारे (Raksha Bandhan) रक्षाबंधनाचा कार्यक्रम नुकताच पार पडला. यात रासेयो च्या विद्यार्थिनींनी पोलीस विभागाच्या पदाधिकारी व शिपायांना राखी बांधून रक्षाबंधन साजरे केले. यावेळी पोलीस स्टेशन अर्जुनी मोरगाव येथील पोलीस निरीक्षक सोनटक्के व पोलीस उपनिरीक्षक मेश्राम यांनी विद्यार्थ्यांना मार्गदर्शन केले. विद्यार्थिनींनी पोलीस अधिकारी व सहकाऱ्यांना राखी बांधली व त्यांच्या प्रति कृतज्ञता व्यक्त केली. या कार्यक्रमाच्या यशस्वी ते करिता रासेयो कार्यक्रम अधिकारी आय. एच. काशीवार, नयना हटवार व नजमा अगवान यांचे सहकार्य लाभले.
