वर्धा (Wardha) :- पोलिसांनी अट्टल घरफोडी करणार्यास ताब्यात घेत त्याच्याकडून ४ लाख ६७ हजार ७५० रुपयांचा मुद्देमाल जप्त केला. पोलिसांनी वर्धा जिल्हा व नागपूर जिल्हा येथील १३ घरफोडीचे गुन्हे (Crime) उघडकीस आणलेत. ही कारवाई स्थानिक गुन्हे शाखेच्या पथकाने केली.
रूममध्ये घरफोडीचे साहित्य तसेच सेलू येथील चोरी गेलेल्या गुन्ह्यातील मुद्देमाल मिळून आला
सेलू येथील कुटुंबिय कार्यक्रमास गेले असता अज्ञात चोरट्यांनी घरफोडी करून १ लाख ४४ हजार ८०० रुपयांचा ऐवज चोरुन नेला. याप्रकरणी तक्रारीवरून सेलू पोलिसांनी गुन्हा दाखल केला. गुन्ह्याचा समांतर तपास स्थानिक गुन्हे शाखा, सायबर सेलमार्फत करण्यात आला. तपासादरम्यान पेट्रोलींग (Patrolling) करीत असताना मुखबीरकडून एक संशयित इसम जाम तालुका समुद्रपूर येथे राहत असल्याची माहिती मिळाली. त्यावरून जाम येथे पोहोचून त्यास ताब्यात घेऊन तो किरायाने राहत असलेल्या रूममध्ये गेले. तेथे त्याच्या रूममध्ये घरफोडीचे साहित्य तसेच सेलू येथील चोरी गेलेल्या गुन्ह्यातील मुद्देमाल मिळून आला. त्याला विश्वासात घेवुन विचारपुस केली असता तेरा घरफोडीचे गुन्हे उघडकीस आणलेत.
गुन्ह्यातील मुद्देमाल जप्त
त्यात सेलू पोलिस ठाण्यात नोंद दोन, समुद्रपूर पोलिस ठाण्यात नोंद तीन, हिंगणघाट पोलिस ठाण्यात नोंद असलेले चार, गिरड, सिंदी (रेल्वे) पोलिस ठाण्यात नोंद असलेला प्रत्येकी एक तसेच नागपूर जिल्ह्यातील बेला पोलिस ठाण्यात नोंद असलेले दोन गुन्हे उघडकीस आले. पोलिसांनी खुशाल पंढरी बारापात्रे (वय ३७) रा. बुटीबोरी, ह.मु. जाम यास ताब्यात घेत अटक केली. आरोपीने दोन साथीदार कमलेश उर्फ महाराज हिरामण नगराळे, सुमेध उत्तम उंबरे, दोन्ही रा. वरोरा जि. चंद्रपूर या दोघांच्या मदतीने वरोरा येथे सोने व चांदीचे दागिने विकले असल्याचे सांगितले. त्याच्याकडूनसुद्धा गुन्ह्यातील मुद्देमाल जप्त करण्यात आला. पोलिसांनी ११ गुन्ह्यातील पिवळ्या धातूचे ११७ ग्रॅम वजनाचे दागिने (किं. ४,५७,९५०रू.), ९० ग्रॅम वजनाचे दागिने (किं. ८६०० रू.), मोबाईल, घरफोडी करण्याकरिता वापरण्यात येणारा लोखंडी सळाख, एक पेचकस असा ४ लाख ६७ हजार ७५० रुपयांचा मुद्देमाल जप्त करण्यात आला आहे. आरोपींकडून आणखी गुन्हे उघडकीस येण्याची शक्यता आहे.
