हिंगोली (Hingoli) :- पिंपळखुटा येथील आत्महत्याग्रस्त शेतकरी राजू गताडे यांच्या कुटुंबियांना शासनाच्या विविध योजनांचा लाभ मिळवून देण्याची खबरदारी घ्यावी, अशा सूचना कै. वसंतराव नाईक शेती स्वावलंबन मिशनचे अध्यक्ष ॲड. निलेश हेलोंडे पाटील यांनी सर्व संबंधित अधिकाऱ्यांना दिल्या. हिंगोली तालुक्यातील पिंपळखुटा येथील आत्महत्याग्रस्त शेतकरी (Farmers)राजू गताडे यांच्या कुटुंबास ॲड. निलेश हेलोंडे पाटील यांनी नुकतीच त्यांच्या निवासस्थानी जाऊन भेट घेतली. त्यावेळी ते बोलत होते. यावेळी तहसीलदार श्रीकांत भूजबळ, गटविकास अधिकारी, महिला व बालविकास अधिकारी, ग्राम विकास अधिकारी व महसूल अधिकारी उपस्थित होते.
शासनाच्या विविध योजनांचा लाभ मिळवून देण्यासाठी संबंधितांना दिल्या सूचना
अँड. निलेश हेलोंडे पाटील यांनी गटविकास अधिकारी यांना सदरील कुटुंबात गोठा अथवा मोसंबीची शेती (फळबाग) करण्यासाठी आवश्यक अनुदान तसेच घरकुलासाठी आवश्यक प्रस्ताव तयार करण्याच्या सूचना दिल्या. तसेच पशुसंवर्धन विभागाने (Animal Husbandry Department) अनुदान तत्त्वावर लहान व मोठे जनावरे उपलब्ध करून द्यावेत. महिला व बाल विकास अधिकारी यांनी आत्महत्याग्रस्त कुटुंबातील वारस मुलांना प्रोत्साहन पर भत्ता मिळवून द्यावा, तहसीलदार यांनी तालुका मुख्यालय येथे आरसेटी प्रकल्पांतर्गत कौशल्य विकास प्रशिक्षणासाठी आवश्यक त्या कोर्समध्ये प्रवेश मिळवून देण्याबरोबरच शासनाच्या सर्वं योजनांचा लाभ त्या कुटुंबास मिळवून देण्याची खबरदारी बाळगावी, अशा सूचनाही त्यांनी केल्या. यावेळी आत्महत्याग्रस्त (suicide) कुटुंबास आतापर्यंत संजय गांधी, विधवा निवृत्ती वेतन योजना, रास्त भाव दुकानदारामार्फत पिवळे रेशन कार्ड अंतर्गत धान्य वाटप, आत्महत्याग्रस्त कुटुंबास देण्यात येणारे सानुग्रह अनुदान एक लाख रुपयाचे वितरण, पीएम किसान तसेच लाडकी बहीण योजना इत्यादींचा लाभ देण्यात आल्याचे उपस्थित अधिकाऱ्यांनी सांगितले.