अहेरी पोलिसांची कामगिरी, ७ दिवसांची पोलीस कोठडी
गडचिरोली (Murder Accused Arrested) : अहेरी तालुक्यातील नागेपल्ली येथील रविंद्र तंगडपल्लीवार( ५०) यांच्या फरार मारेकर्यास अहेरी पोलिसांनी काल २० जानेवारी रोजी अटक केली असून त्याला न्यायालयापुढे उभे केले असता न्यायालयाने ७ दिवसांची पोलीस कोठडी ठोठावली आहे. समय्या मलय्या सुंकरी (३५ ) रा. मद्दीगुडम, ता. अहेरी. असे आरोपीचे नांव आहे.
नागेपल्ली येथील रविंद्र तंगडपल्लीवार हे आपल्या पत्नीला प्रगती नागरी पतसंस्था, आलापल्ली येथे आरडीचे पैस भरुन येतो असे म्हणुन सांगून १८ जानेवारी रोजी घरुन निघुन गेले होते. परंतु ते संध्याकाळ पर्यत परत न आल्याने पोलीस ठाण्यात दिलेल्या तक्रारीवरुन मिसींग दाखल करण्यात आली होती. दि. १९ जानेवारी रोजी सकाळी ०९.३० वा दरम्यान मिसींग मधील इसमाचा आलापल्ली ते सिरोंचा महामार्ग क्रमांक ३५३ (सी) वर नागामाता मंदीर जवळील जंगल परिसरात कोणीतरी अज्ञात इसमाने धारदार शस्त्राने डोक्यावर, मानेवर, चेहर्यावर मारुन खुन झाल्याची माहिती मिळाली. त्यावरुन अहेरी पोलीस ठाण्यात गुन्हा नोंद करण्यात आला.
सदर गुन्हयात पोलीस अधीक्षक निलोत्पल, अहेरीचे अपर पोलीस अधीक्षक कार्तीक मधीरा, अहेरीचे उपविभागीय पोलीस अधिकारी अजय कोकाटे यांच्या मार्गदर्शनाखाली पोलीस पथक तयार करुन शोध मोहिम राबविण्यात आली. मुखबिर व्दारे माहिती मिळवून व तांत्रिक तपासाच्या सहायाने आरोपी बाबत कुठलीही माहिती नसतांना सदर गुन्हा उघड करण्यात आला .यातील आरोपी समय्या मलय्या सुंकरी यास चौकशीसाठी ताब्यात घेवून विचारपूस केली असता याने गुहयाची कबुली दिल्याने त्यास काल दिनांक २० जानेवारी रोजी अटक करण्यात आली. त्याला आज २१ जानेवारी रोजी न्यायालया समोर पेश करुन पोलीस कस्टडीची मागणी केली असता मा. न्यायालयाने दि.२८ जानेवारी रोजी पर्यत आरोपीचा पोलीस कस्टडी रिमांड मान्य केला आहे. या गुन्हयाचा पुढील तपास पोलीस निरीक्षक हर्षल ओकरे हे करीत आहेत.
