एका सरपंचाने लिहिले बदलीच्छुक गुरुजींना पत्र!
लातूर (Teacher Transfer) : राज्यात शिक्षक बदली पोर्टल सध्या सुरू झाले आहे. शिक्षक बदलीसाठी (Teacher Transfer) संवर्गाच्या अर्ज शिक्षकांची सध्या धावपळ सुरू आहे. पोर्टल भरण्यासाठी आणि इच्छित शाळेत बदली करून घेण्यासाठी उत्सुक शिक्षकांना या बदलीच्या हंगामात औसा तालुक्यातील लामजना सरपंचांनी जाहीर पत्र लिहिले आहे. आमच्या लामजना जिल्हा परिषद शाळा प्रगतीचा आलेख उंचावण्याचे काम आजपर्यंत शाळेतील शिक्षक वृंदांनी केले आहे, ते काम पुढे नेटाने चालविण्यासाठी शाळेत अतिरिक्त वेळ देण्याची, शाळेतील विद्यार्थी (Students) घडविण्याची तयारी असेल तरच लामजना शाळेचा पसंती क्रम पोर्टलमध्ये (Portal) द्यावा, असे पत्र लामजना सरपंचांनी गुरुजींना लिहिले आहे.
पत्रातली भावनाच जणू लामजना सरपंचांनी आपल्या या जाहीर पत्रात मांडली!
‘प्रिय गुरुजी, सगळीच माणसे न्यायप्रिय नसतात, नसतात सगळीच सत्यनिष्ठ, हे शिकेलच माझा मुलगा कधी ना कधी…’अशी पत्राची सुरुवात करून अमेरिकेचे सोळावे राष्ट्राध्यक्ष अब्राहम लिंकन यांनी त्यांचा मुलगा शिकत असलेल्या शाळेच्या हेडमास्तरांना पत्र लिहिले. हे पत्र आजही जगभर वाचले जाते… तसेच ‘माफ करा गुरुजी! मी फार बोलतो आहे, खूप काही मागतो आहे… पण पहा, जमेल तेवढं अवश्य कराच. माझा मुलगा -भलताच गोड छोकरा आहे हो तो!’, असा लिंकन यांच्या पत्राचा शेवट आहे. शाळेतील मुले ही देवाची फुले आहेत, अशी या पत्रातली भावनाच जणू लामजना सरपंचांनी आपल्या या जाहीर पत्रात मांडली आहे.
जाहीर पत्र जिल्ह्यातील गुरुजनांना लिहिले आहे, त्याची सध्या सोशल माध्यमांवर जोरदार चर्चा!
सध्या बदलीसाठी संवर्ग 4 मधील शिक्षक पोर्टल भरत आहेत. कदाचित लामजना येथील जिल्हा परिषद प्राथमिक शाळेसाठी (Zilla Parishad Primary School) काही शिक्षक पसंती क्रमांक देतील. लामजना येथील जि. प. शाळेत स्कॉलरशिप, नवोदय, एमटीएस, सैनिकी शाळा पूर्वतयारी परीक्षा याची उत्तम प्रकारे तयारी केली जाते. शाळेच्या प्रगतीचा आलेख उंचावण्याचे काम या शाळेतील शिक्षकांनी आजपर्यंत केले आहे. सध्या बदलीचे वारे वाहत आहे. अनेक शिक्षक या प्रक्रियेत लामजना जि. प. शाळेसाठी पसंती क्रम भरणार आहेत. तेव्हा ज्यांना स्कॉलरशिप, नवोदय यासह शालेय उपक्रम घेण्यामध्ये स्वारस्य आहे… शाळेसाठी अतिरिक्त वेळ देण्याची, शाळेतील विद्यार्थी घडविण्याची तयारी आहे, कृपया अशाच कर्तव्य भावनेने काम करणाऱ्या शिक्षकांनी जिल्हा परिषद प्राथमिक शाळा लामजना या शाळेचा पसंती क्रमांक भरावा… सरपंच (Sarpanch) महेश सगर यांनी हे जाहीर पत्र जिल्ह्यातील गुरुजनांना लिहिले आहे, त्याची सध्या सोशल माध्यमांवर जोरदार चर्चा सुरू आहे.
