मानोरा(Washim):- मानोरा ते श्रीक्षेत्र आसोला खुर्द परमहंस श्री सोहंमनाथ महाराज मंदीर संस्थान ९ किलोमिटर अंतरावर असलेल्या शहरातील जय वीर हनुमान, गजराज व संत सोनपाकु महाराज कावड मंडळाच्या वतीने तिसऱ्या श्रावण सोमवारी दि. १९ ऑगस्ट रोजी १२२ भव्य कावड भरणीची यात्रा काढण्यात आली. या कावड यात्रेत हजारो शिव व सोहंम भक्त सहभागी झाले होते. यावेळी शहरासह श्रीक्षेत्र आसोला खुर्द नगरी हर हर महादेव, जय सोहमनाथांच्या जयघोषाने दुमदुमून गेली होती.
शहरातून ९ किलो मीटर वाजत गाजत निघालेल्या कावड यात्रेत शिवभक्त मोठ्या संख्येने सहभागी
तालुका ठिकाण मानोरा शहरातून कावड यात्रेला (Kawad Yatra)प्रारंभ झाला. अरुणावती नदी पात्रातून कावड मध्ये जल भरून नदी काठी वसलेल्या गणपती मंदीर व बालाजी मंदिर, संतोषी मातेची पूजा अर्चा करून शहरातील दिग्रस चौक, शिवाजी महाराज चौक आणि संत सेवालाल महाराज चौक मार्गे श्रीक्षेत्र आसोला खुर्द येथील परमहंस श्री सोहंमनाथ महाराज मंदिराकडे शहरातून ९ किलो मीटर वाजत गाजत निघालेल्या कावड यात्रेत शिवभक्त मोठ्या संख्येने सहभागी झाले. शहरातून कावड यात्रा भगवान शिव शंकर यांची मुर्तीसह विविध पथक, पारंपारिक वाद्य व जय भोलेनाथ, हर हर महादेव व जय सोहंमनाथांच्या जयघोषाने शिवभक्त भक्तीमय वातावरणात सोमठाणा, सोमनाथनगर, गव्हा, आसोला फाटा येथे कावड यात्रेचे शिव भक्तांनी ठिकठिकाणी जल्लोषात स्वागत करून अनेक शिव भक्तांनी चहा, पाणी, नाश्ता व फरालाची व्यवस्था केली होती.
संस्थानच्या वतीने कावड यात्रेचे भव्य स्वागत
दरम्यान कावड यात्रेत हजारो शिवभक्तांनी सहभाग घेतला. सायंकाळी पायदळ कावड यात्रा श्रीक्षेत्र आसोला मंदीर संस्थान प्रांगणात पोहचताच संस्थानच्या वतीने कावड यात्रेचे भव्य स्वागत करण्यात आले. त्यानंतर शिव भक्तांनी महाआरती, पूजा करून कावड मधील पवित्र तिर्थ जल भगवान शिव शंकर व श्री सोहमनाथांच्या चरणी अर्पण करून बळीराजा सुख शांती दे, पाऊस पडू दे, अशी हजारो शिव भक्तांनी प्रार्थना केली.
यावेळी पोलीसांनी कडेकोट पोलीस बंदोबस्त तैनात होता.
