कारंजा(Washim) :- रक्षाबंधन निमित्त बहिणीकडे गेलेला भाऊ राखी बांधून घरी परत जात असताना त्याचा रस्त्यात अपघात (Accident)झाला. ही घटना २० ऑगस्ट रोजी सकाळी १० वाजताच्या सुमारास मानोरा रस्त्यावरील दापुरा गावाजवळ घडली.
या घटनेत भाऊ गंभीर जखमी (Injured) झाला आहे. संतोष महादेव भिसे (३२, रा. चोंढी ता. मानोरा) असे जखमी भावाचे नाव आहे. त्याची बहीण इंझोरी येथे राहते. तिच्या घरी जावून राखी बांधल्यानंतर तो परत मोटारसायकलने घरी जात असताना मार्गात त्याच्या ताब्यातील वाहनाची बैलबंडीला जोरदार धडक बसली. या घटनेत तो गंभीररित्या जखमी झाला. त्याला समृद्धी रुग्णवाहिकेच्या चालकाने येथील उपजिल्हा रुग्णालयात दाखल केले. त्याच्यावर वैद्यकीय अधिकाऱ्यांनी प्रथमोपचार करून त्याला बाहेरगावी रेफर केले आहे.
