मानोरा (Washim) :- श्रीक्षेत्र आसोला खुर्द येथील भगवान शिव शंकराचे परम भक्त जागृत ईश्वर परमहंस श्री सोहंमनाथ महाराजांच्या समाधी सोहळ्यानिमित्त दि. ९ एप्रिल रोजी लाखो भाविक भक्तांनी श्रींच्या चरणी नतमस्तक होवून आशीर्वाद घेतला. यावेळी जय सोहंमनाथांच्या जयाघोषनेने पंचक्रोशीत आसोला नगरी दुमदुमून गेली होती. बारस दिनी दोन हजाराच्या जवळपास भक्तांनी श्रींचे गाढे ओढून पुरण पोळीचा नवस फेडला. यावेळी चिमुकला बालकानेही शेंडीला धागा बांधून कबूल केलेला गाढे ओढण्याचा नवस फेडला.
हजारो भाविकांनी घेतला महाप्रसादाचा लाभ
गुढी पाडवा ते बारस पर्यंत परमहंस श्री सोहंमनाथ महाराज मंदीर संस्थानवर समाधी सोहळ्यानिमित्त राज्यभरातून लाखो भाविक यात्रा (journey) महोत्सवासाठी (festival) दाखल झाले होते. मंदीर संस्थानवर गुढीपाडवा पासून विविध धार्मिक कार्यक्रमाचे आयोजन करण्यात आले होते. बारस दिनी बुधवारी सकाळी ७ वाजता श्रींचा अभिषेक व शेंडीला धागा बांधून गाढे ओढण्यास सुरूवात झाली. दुपारी १२ वाजता श्रीमद् भागवत ज्ञानयज्ञ कथेची सांगता व सायंकाळी ५ वाजता महाप्रसाद कार्यक्रम पार पडला. यावेळी हजारो भाविकांनी महाप्रसादाचा लाभ घेतला. यावेळी यात्रेत प्रशासन व अनेक भक्तांनी टँकरने भाविकांना पाणी पुरवठा करून सेवा दिली. भाविक भक्त शाळा परिसर, शेतात, गोठ्यात, झाडाखाली व मिळेल त्या ठिकाणी आश्रय घेत पुरण पोळीचा नैवेद्य तयार करत श्रींना अर्पण करून आपला नवस फेडत उपवास सोडवला. मंदीर परिसर व यात्रा महोत्सवात कुठलाही अनुचित घटना घडू नये, यासाठी पोलीसांनी चोख बंदोबस्त तैनात ठेवला होता तर परमहंस सोहंमनाथ महाराज सेवा समिती मंडळाच्या स्वयंसेवकांनी भाविकांना सेवा पुरविली.
श्री सोहमनाथ महाराजांच्या समाधीचे रांगेत उभे राहून बारीने दर्शन घेण्यासाठी भक्तांनी चिक्कार गर्दी केली होती. मंदीर परीसरात गाड्यांचे साहित्य, मिठाई, श्रीफळ, बेल फुल व्यावसायिकानी हजेरी लावली होती. यात्रेसाठी येणाऱ्या व जाणाऱ्या भाविकांची गैरसोय होवू नये यासाठी सोहमनाथ विद्यालय परिसर, सोमठाणा, गव्हा, सोमनाथनगर व विठोली या गावातील दानशूर भक्तांनी पिण्याचे पाणी, चहा, उपवासाचे उसळ व खिचडी वाटप करून भाविकांना सेवा दिली.
