Yawatmal :- आदिवासी समाजामध्ये कोणतीही जमात समावेश करू नये यासाठी आदिवासी समाजाची (Adivasi community)जिल्हास्तरीय बैठक २१ सप्टेंबर २०२५ रोजी स्थानिक वाघापूर येथील बिरसा भवन येथे आदिवासी आरक्षण बचाव कृती समितीच्या वतीने जिल्हा स्तरावर आयोजन करण्यात आली होती. या सभेच्या अध्यक्षस्थानी आदिवासी समाजातील योगाचार्य दशरथजी ताडाम होते. यावेळी आदिवासींच्या आरक्षणाच्या रक्षणाकरीता १० ऑक्टोबर रोजी समता मैदान येथे आदिवासी आक्रोश क्रांती महामोर्चा काढण्याचा निर्णय आदिवासी समाजाच्या जिल्हास्तरीय बैठकीमध्ये घेण्यात आला.
आदिवासी समाजाची जिल्हास्तरीय बैठकीत निर्णय
सर्वप्रथम आदिवासींमध्ये घुसखोरी करणार्‍या आणि नव्याने आदिवासी होऊ पाहणार्‍या समाजाला कुठल्याही परिस्थितीत अनुसूचित जमातीला स्थान नाही असे सर्वानुमते ठरविण्यात आले. आधीच आदिवासी समाजामध्ये गैरआदिवासी नौकर्‍या बळकावल्या आहेत. आदिवासी समाज आता अन्याय सहन करणार नाही,अशा स्वरूपाच्या तीव्र भावना समाज बांधवांच्या होत्या. बंजारा समाजाच्या अनुसूचित जमातीमध्ये समावेश करण्याच्या मागणच्या निषेधार्थ महाराष्ट्र मोठे आंदोलन करण्याचा ठराव एकमताने घेण्यात आला. यावेळी सुरेश कन्नाके, अ‍ॅड.प्रमोद घोडाम, राजु मडावी, भिमराव खारोडे, किरण कुमरे, मधुसूदन कोवे, संदीप पेंदोर, डॉ.मधुकर मडावी, डॉ.मोहन गेडाम, अरविंद केराम,राहुल सोयाम, होमदेव कन्नाके, रमेश भिसनकर,संतोष पारधी,शंकर मडावी, महेश कुमार सिडाम यांनी मनोगत व्यक्त केले.
