वाशिम (Washim):- एका रुग्णाला उपचाराकरिता अमरावती (Amravati) येथे सोडून परत कारंजा येथे येणारी 108 रुग्णवाहिका(Ambulance) मार्गावरील उभ्या नादुरुस्त ट्रक ला धडकली. त्यामुळे घडलेल्या अपघातात रुग्णवाहिकेतील कर्तव्यावरील डॉक्टरचा मृत्यू झाला तर चालक गंभीर जखमी (seriously injured) झाला.
रुग्णाला अमरावती येथे उपचाराकरिता सोडून परत जात असताना अपघात
अपघाताची ही घटना 23 मे ला पहाटे 2 वाजता च्या दरम्यान कारंजा अमरावती मार्गावरील धोत्रा फाट्याजवळ घडली. डॉ.प्रा.ललित बाबुसिंग जाधव वय 50 वर्ष असे मृत्यू पावलेल्या डॉक्टरचे नाव असून ते कारंजा तालुक्यातील पिंप्री फॉरेस्ट येथील रहिवासी असल्याची माहिती पुढे आली आहे. तर या अपघातात रुग्णवाहिका चालक नरेंद्र बारसे वय 38 वर्ष रा.कारंजा हे गंभीर जखमी झाले. प्राप्त माहितीनुसार कारंजा लोकेशनची 108 रुग्णवाहिका एका रुग्णाला अमरावती येथे उपचाराकरिता सोडून परत कारंजा येथे येत असताना मार्गातील अपघात स्थळी रस्त्यावर ब्रेक फेल (brake failure) झाल्यामुळे उभ्या असलेल्या एका मोठ्या ट्रकला मागून धडकली. समोरील वाहनाच्या लाईटचा प्रकाश रुग्णवाहिका चालकाच्या डोळ्यावर पडल्याने त्याला समोरील वाहन दिसले नाही, त्यामुळे हा अपघात घडल्याची माहिती सूत्रांनी दिली आहे. एवढ्यात कारंजा येथून 102 रुग्णवाहिका अमरावती येथे रुग्णाला घेऊन जात असताना त्यांच्या हा अपघात (Accident)निदर्शनास आला.
तपासणी दरम्यान डॉक्टरला मृत घोषित
त्यामुळे त्यांनी पोलिसांना घटनेची माहिती देऊन ट्रकमध्ये फसलेली रुग्णवाहिका बाहेर काढली आणि मृत व जखमीला कामरगाव ग्रामीण रुग्णालयात दाखल केले. परंतु तपासणी दरम्यान डॉक्टरला मृत घोषित केले तर चालकाची प्रकृती गंभीर असल्याचे निदर्शनास आल्याने त्याला पुढील उपचारासाठी अमरावती येथे पाठविण्यात आल्याची माहिती कामरगाव ग्रामीण रुग्णालय प्रशासनाच्या वतीने देण्यात आली आहे. दरम्यान घटनेची माहिती मिळताच धनज पोलिसांनी देखील घटनास्थळी धाव घेऊन फसलेली रुग्णवाहिका बाहेर काढण्यासाठी व जखमींना उपचारार्थ पाठविण्यासाठी मदत केली. वृत्त लिहेस्तोवर पोलिसातील अपघाताच्या नोंदीचा तपशील मात्र प्राप्त झाला नाही.
