- सलग दोन दिवसांत दोन हत्या, जिल्हा हादरला
- अकोला शहराजवळील यावलखेड येथील घटना
- आरोपी पतीस अवघ्या एका तासात अटक
अकोला : बोरगाव मंजू पोलीस स्टेशन हद्दीतील तसेच अकोला शहराजवळ असलेल्या यावलखेड येथे घरगुती वादातून पतीने धारदार शस्त्र चाकूने वार करून पत्नीची निर्घृण हत्या केल्याची धक्कादायक घटना गुरुवार, ९ एप्रिल राेजी सकाळी उघडकीस आली. याप्रकरणी पोलिसांनी आरोपी पतीस अवघ्या एका तासात अटक करून बोरगाव मंजू पोलिसांच्या स्वाधीन केले आहे. पोलीस सूत्रांकडून मिळालेल्या माहितीनुसार, आरोपी अनिल ओंकार निंभोकार (४२) रा. यावलखेड याने कौटुंबिक वादाच्या रागातून पत्नी वृषाली अनिल निंभोकार (३२) हिच्यावर चाकूने हल्ला केला. या हल्ल्यात वृषाली निंभोकार हिचा मृत्यू झाला. घटनेनंतर परिसरात भीतीचे व तणावाचे वातावरण निर्माण झाले होते. याप्रकरणी पोलीस स्टेशन बोरगाव मंजू येथे भारतीय न्याय संहिता कलम १०३(१) अंतर्गत खुनाचा गुन्हा दाखल करण्यात आला आहे. त्यानंतर आरोपीला अटक करण्यात आली आहे. ही कारवाई पोलीस अधीक्षक अर्चित चांडक व अपर पोलीस अधीक्षक बी. चंद्रकांत रेड्डी यांच्या मार्गदर्शनात पोलीस निरीक्षक शंकर शेळके, पोलीस निरीक्षक अजित जाधव यांच्यासह पोलीस उपनिरीक्षक गोपाल जाधव, विष्णू बोडखे, अंमलदार सुलतान पठाण, गोकूळ चव्हाण, मोहम्मद आमीर, अशोक सोनवणे यांनी केली आहे. ------------- आरोपी फरार होण्याच्या बेतात घटनेनंतर आरोपी अनिल निंभोकार हा अकोल्यातून फरार होण्याच्या बेतात असताना पोलिसांनी सापळा रचून त्याला ताब्यात घेतले. प्रभारी ठाणेदार पोलीस निरीक्षक अजित जाधव यांनी स्थानिक गुन्हे शाखेला तत्काळ माहिती दिल्यानंतर पोलीस निरीक्षक शंकर शेळके यांच्या मार्गदर्शनात पथक रवाना करण्यात आले.
ग्रामस्थांनी केले महिलेला उपचारार्थ दाखल
आरोपी पतीने पत्नीची धारदार शस्त्र चाकूने वार करून हत्या केल्यानंतर यावलखेड गावातील ग्रामस्थांनी अकोल्यातील सर्वोपचार रुग्णालयात तिला उपचारार्थ दाखल केले. परंतु, त्यापूर्वीच सदर महिलेचा मृत्यू झाला होता.
- आरोपीला सर्वोपचार रुग्णालयातून केली अटक
सदर पथकाने आरोपीस अकोला शहरातील सर्वोपचार रुग्णालय येथून ताब्यात घेत पोलीस स्टेशन बोरगाव मंजू यांच्या स्वाधीन केले. या घटनेचा पुढील तपास पोलीस स्टेशन बोरगाव मंजू करीत आहे.
दोन्ही चिमुकले झाले पोरके
आरोपी पती अनिल निंभोकार याने पत्नी वृषाली अनिल निंभोकार हिची संतापाच्या भरात धारदार शस्त्र चाकूने वार करून हत्या केली. त्यांना दोन मुले असून, एक 11 तर दुसरा 8 वर्षाचा आहे. या हत्येमुळे दोन्ही चिमुकले आता पोरके झाल्याने यावलखेड गावात हळहळ व्यक्त करण्यात येत असून, समाजमन सुन्न झाले आहे.
