हिंगोली (Chicholi Niloba Illegal Raid) : अवैध सावकारीमुळे अडचणीत आलेल्या शेतकऱ्यांना न्याय देण्यासाठी जिल्हा प्रशासनाने कठोर पाऊल उचलले आहे. औंढा नागनाथ तालुक्यातील चिचोली निळोबा येथे जिल्हा उपनिबंधक सुरेखा फुपाटे यांच्या पथकाने गुरुवारी 9 जुलै रोजी सकाळी 7 वाजता एका घरावर धाड टाकून अवैध सावकारीचे प्रकरण उघडकीस आणले.
औंढा नागनाथ तालुक्यातील चिचोली निळोबा (Chicholi Niloba Illegal Raid) येथील सुंदरराव मोरे यांच्याविरुद्ध एका शेतकऱ्याने जिल्हा उपनिबंधक कार्यालयात तक्रार दाखल केली होती. तक्रारदाराने सांगितले की काही रक्कम घेऊन त्यांनी आपली शेती मोरे यांच्या नावावर करून दिली होती. मात्र रक्कम परत करूनही जमीन परत मिळत नसल्याने त्यांनी प्रशासनाकडे मदत मागितली. या तक्रारीची दखल घेत जिल्हा उपनिबंधक सुरेखा फुपाटे यांनी तातडीने कारवाईचे आदेश दिले.
सहकार अधिकारी बी. डी. पठाडे, ए. ए. वानखेडे, एस. जी. आंधळे, के. जी. घालेवाड, जमादार रोहिदास राठोड आणि महिला पोलीस कर्मचारी साधना शेळके यांचा समावेश असलेल्या पथकाने चिचोली निळोबा येथे सुंदरराव मोरे यांच्या घराची झडती घेतली. घरातील पेटी आणि इतर साहित्याची तपासणी केली असता तेथे शेतकऱ्यांच्या जमिनी संदर्भातील 11 खरेदीखत आढळून आली. याशिवाय तीन बॉण्डवर जागेची खरेदीखत करण्यात आल्याचे दिसून आले. पथकाला 9 कोरे बॉण्ड, पैशाच्या व्यवहाराच्या पाच चिट्ठ्या आणि सन 2017 पासूनच्या सात दिनदर्शिका देखील सापडल्या. या दिनदर्शिकांमध्ये पैशाच्या व्यवहारांच्या तारखा नमूद करण्यात आल्या होत्या.
पथकाने पंचनामा करून सर्व साहित्य जप्त केले असून ते जिल्हा उपनिबंधक कार्यालयात आणण्यात आले आहे. या (Chicholi Niloba Illegal Raid) कारवाईमुळे जिल्ह्यात अवैध सावकारी करणाऱ्यांमध्ये भीतीचे वातावरण निर्माण झाले आहे. जिल्हा उपनिबंधक सुरेखा फुपाटे यांनी माहिती दिली की जप्त करण्यात आलेल्या कागदपत्रांची तपासणी मंगळवारी 14 जुलै रोजी केली जाणार आहे. त्यानंतर महाराष्ट्र सावकारी विरोधी कायद्याच्या कलम 15 नुसार सुनावणी घेण्यात येईल. सुनावणी दरम्यान खरेदीखत नोंदविलेल्या शेतकऱ्यांचे जबाब नोंदवून पुढील कायदेशीर प्रक्रिया राबवली जाणार आहे.
