परभणीत ऑटो अपघातात तरुण कामगाराचा मृत्यू; दोघे जखमी

सिरसम ते बोर्डा मार्गावर अपघात; जखमी गंगाखेड उपजिल्हा रुग्णालयात दाखल

परभणी (Parbhani Worker Death) :  गंगाखेड तालुक्यात ऑटो अपघातात तरुण कामगाराचा मृत्यू झाल्याची घटना गुरुवार १३ ऑगस्ट रोजी सकाळी १० वाजेच्या सुमारास सिरसम रस्त्यावर घडली या अपघातात अन्य दोघे जखमी झाले आहेत.

याबाबत समजलेली अधिक माहिती अशी की, गंगाखेड येथून बोर्डा येथे कामावर जाण्यासाठी गुरुवार १३ ऑगस्ट रोजी सकाळी बांधकाम कामगार घेऊन जाणार्‍या अपे ऑटोसमोर सकाळी अंदाजे ९:३० ते १० वाजेच्या सुमारास अचानक कुत्र आल्याने सिरसम मार्गे बोर्डाकडे जाणार्‍या रस्त्यावर झालेल्या अपे ऑटोच्या अपघातात सुरज श्रीहरी कांबळे वय २३ वर्ष रा. महात्मा फुले नगर गंगाखेड या तरुण कामगाराचा जागीच मृत्यू झाला तर कुंदन सर्जेराव माने वय ४४ वर्ष रा. गौतमनगर गंगाखेड व आय्युब पठाण वय ३४ वर्ष रा. आझाद नगर गंगाखेड हे दोन बांधकाम कामगार जखमी झाले.

सिरसम मार्गे बोर्डा जाणार्‍या रस्त्यावर ऑटोचा अपघात झाल्याची माहिती समजताच गंगाखेड येथील खाजगी रुग्णवाहिका चालक दिपक सपकाळ यांनी घटनास्थळी धाव घेत ग्रामस्थांच्या व अन्य वाहन धारकांच्या मदतीने तिघांना ही गंगाखेड उपजिल्हा रुग्णालयात दाखल केले असता निवासी वैद्यकीय अधिकारी डॉ. मोहिनी मुंडे, परिचारिका अश्विनी मुंडे, पल्लवी माने, द्वारकादास बडे आदींनी उपचार करून सुरज श्रीहरी कांबळे यास मयत घोषित केले. याप्रकरणी जखमी कुंदन माने या कामगाराच्या जबाबावरून गंगाखेड पोलीस ठाण्यात गुन्हा दाखल करण्याची प्रक्रिया सुरु होती.