भूम (Bhoom Municipal Council) : भूम नगरपरिषदेच्या घनकचरा व्यवस्थापनाचे टेंडर संपणे आणि विधानपरिषदेच्या निवडणुकीमुळे लागू झालेल्या आदर्श आचारसंहितेच्या पार्श्वभूमीवर प्रशासन मार्गदर्शनाच्या प्रतीक्षेत अडकल्याने शहरातील कचरा संकलन पूर्णपणे बंद पडले होते. या परिस्थितीत जनशक्ती नगर विकास आघाडीच्या नगरसेवकांनी स्वतः पुढाकार घेत आपल्या-आपल्या प्रभागात स्वखर्चाने तीन ट्रॅक्टर लावून कचरा संकलन सुरू केले. त्यांच्या या उपक्रमाचे शहरभर कौतुक होत आहे.
भूम नगरपरिषदेच्या घनकचरा व्यवस्थापनाचे टेंडर संपल्याने, तसेच विधानपरिषदेची निवडणूक जाहीर होऊन आदर्श आचारसंहिता लागू झाल्यामुळे सर्वसाधारण सभा घेता आली नाही. परिणामी शहरातील घंटागाड्या आणि नाली सफाईचे काम पूर्णपणे ठप्प झाले.
या पार्श्वभूमीवर जनशक्ती नगर विकास आघाडीच्या नगरसेवकांनी नगराध्यक्ष आणि मुख्याधिकारी यांना लेखी निवेदन देत तात्पुरत्या स्वरूपात कंत्राटी मजूर नेमून स्वच्छता व्यवस्था सुरू ठेवण्याची मागणी केली होती. मात्र, नगराध्यक्ष आणि मुख्याधिकारी यांनी याबाबत वरिष्ठ कार्यालयाकडून मार्गदर्शन मागितले असल्याचे पत्रकार परिषदेत सांगितले. त्यानंतरही कोणताही ठोस निर्णय झाला नाही.
अखेर नगरसेवकांनी स्वतः पुढाकार घेत आपल्या-आपल्या प्रभागात स्वखर्चाने तीन ट्रॅक्टरच्या माध्यमातून कचरा संकलन सुरू केले. लक्ष्मी नगर, गालिब नगर, निखिल नगर, एस. पी. कॉलेज परिसर, वडार गल्ली, भीमनगर, साठेनगर, बागवान गल्ली, कोष्टी गल्ली, समर्थनगर, शिवाजीनगर, शाळू गल्ली, गराडा गल्ली, वीर गल्ली, विजयनगर आणि गांधी चौक या भागांमध्ये ही स्वच्छता मोहीम राबविण्यात आली.
या उपक्रमामुळे नागरिकांना होणारा त्रास मोठ्या प्रमाणात कमी झाला असून, विशेषतः महिला वर्गामध्ये समाधानाचे वातावरण निर्माण झाले आहे. प्रभागात नियमितपणे ट्रॅक्टर फिरत असल्याने स्वच्छतेची व्यवस्था सुधारल्याचे नागरिकांनी सांगितले. नगरसेवकांनी स्वखर्चाने सुरू केलेल्या या स्वच्छता मोहिमेचे नागरिकांसह महिला वर्गानेही स्वागत केले आहे.
नगराध्यक्षांनी जबाबदारी झटकली असली तरी "माझा प्रभाग, माझी जबाबदारी" या भूमिकेतून नगरसेवकांनी प्रत्यक्ष काम करून दाखवले, अशी चर्चा शहरातील नागरिकांमध्ये सुरू आहे.
