बैल जोडी चोरी करणाऱ्या दोघांसह पिकअप वाहन ताब्यात...!
परभणीच्या मानवत तालुक्यातील हात्तलवाडी येथील शेत आखाड्यावरून शनिवार, ८ ऑगस्ट रोजी पहाटे ५ वाजेच्या सुमारास चोरीस गेलेली बैल जोडी गंगाखेड शहरातील जनावरांच्या शनिवार बाजारात आढळून आली आहे. पशुपालक शेतकऱ्याच्या सतर्कतेमुळे पोलिसांनी चोरीस गेलेल्या बैल जोडीसह दोघांना पिकअप वाहनासह ताब्यात घेतले आहे.
याबाबत समजलेली अधिक माहिती अशी की, मानवत तालुक्यातील हात्तलवाडी शिवारातील शंकर पंडितराव मोगरे या शेतकऱ्याच्या शेत आखाड्यावर बांधलेली बैलांची जोडी शनिवार, ८ ऑगस्ट रोजी पहाटे ५ वाजेच्या सुमारास अज्ञात चोरट्यांनी चोरून नेल्याची घटना घडली.
शेतकरी शंकर पंडितराव मोगरे हे सकाळी ६ वाजता शेतात आले असता त्यांना आखाड्यावर बांधलेली बैल जोडी दिसली नाही. त्यांनी शेताशेजारील शेतकरी शफिक उस्मान शेख यांच्या आखाड्यावर जाऊन त्यांच्याकडे बैलांबाबत विचारणा केली. त्यानंतर परिसरात पाहणी केली असता बैलांच्या गळ्यातील घागरमाळ बैलगाडीवर अडकविलेली दिसून आली. त्यामुळे बैल चोरीस गेल्याचे त्यांच्या लक्षात आले.
त्यानंतर त्यांनी बैलांच्या पायांच्या खुणांवरून माग काढला. नागरजवळा रस्त्यापर्यंत बैल जोडी आणल्याच्या खुणा तसेच तेथेच पिकअप वाहनाच्या चाकांच्या खुणा दिसून आल्या. त्यामुळे अज्ञात चोरट्यांनी बैल जोडी पिकअप वाहनात टाकून पोखर्णीमार्गे गंगाखेडकडे नेल्याचा अंदाज शेतकरी शंकर पंडितराव मोगरे यांनी व्यक्त केला.
याबाबत त्यांनी सरपंचांमार्फत मानवत पोलीस ठाण्याला माहिती दिली. त्यानंतर शफिक उस्मान शेख, दत्ता कुंडलिकराव मोगरे व अन्य ग्रामस्थांसोबत त्यांनी गंगाखेड गाठून येथील जनावरांच्या शनिवार बाजारात पाहणी केली. यावेळी चोरीस गेलेली बैल जोडी शनिवार बाजारात आढळून आली.
ही बाब त्यांनी तातडीने गंगाखेड पोलीस ठाण्यातील सहाय्यक पोलीस उपनिरीक्षक शंकर रेंगे यांच्या निदर्शनास आणून दिली. त्यानंतर बैल जोडीसोबत कार्तिक अर्जुन उक्कलकर, चालक अर्जुन अंकुश क्षिरसागर यांना बोलेरो पिकअप एमएच २० ईएल ७२८२ क्रमांकाच्या वाहनासह गंगाखेड पोलीस ठाण्यात आणण्यात आले.
त्यानंतर त्यांना मानवत पोलीस ठाण्याचे पोलीस उपनिरीक्षक किशनराव पतंगे, पोह. जावेद शेख, पोशि. चंद्रशेखर कावळे यांच्या स्वाधीन करण्यात आले. याप्रकरणी पुढील कारवाईची प्रक्रिया मानवत पोलीस ठाण्यात सुरू होती.
