लातूर (Child Safety Awareness) : शहरातील बोधे नगर परिसरात अत्यंत हृदयद्रावक घटना घडली असून, खेळत असताना पाण्याच्या डबक्यात पडून दोन लहान मुलांचा दुर्दैवी मृत्यू झाला. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, बोधे नगर येथील रामला इंडस्ट्रीजच्या पाठीमागील भागात टँकरसाठी पाणी साठविण्यात येणाऱ्या डबक्यात खेळता खेळता दोन चिमुकले पडले. या घटनेत दिव्या नवनाथ उबाळे (वय ६) आणि कार्तिक भरत कांबळे (वय ७) यांचा बुडून मृत्यू झाला.
घटनेची माहिती मिळताच परिसरातील नागरिकांनी तातडीने दोघांना बाहेर काढून शासकीय रुग्णालयात दाखल केले. मात्र वैद्यकीय अधिकाऱ्यांनी तपासणीअंती दोघांनाही मृत घोषित केले.
या दुर्दैवी घटनेमुळे बोधे नगर परिसरात शोककळा पसरली असून नागरिकांकडून हळहळ व्यक्त केली जात आहे. दरम्यान, अशा धोकादायक पाणीसाठ्यांभोवती सुरक्षिततेच्या उपाययोजना करण्याची मागणी नागरिकांकडून होत आहे.
