उपोषणाची दखल; चौकशी समिती नेमणार, ५ ऑक्टोबरच्या बैठकीत अंतिम निर्णय
माहूर : दत्त शिखर संस्थान येथे चिंतामण भारती यांनी उपोषण सुरू केले होते. या उपोषणाची माहिती पंचदशनाम जुना आखाड्याचे राष्ट्रीय अध्यक्ष महंत मोहन भारती महाराज यांना मिळाली. महंत महाराज यांच्या तक्रारीची तत्काळ दखल घेण्यात आली असून, चिंतामण भारती यांना ५ ऑक्टोबरपर्यंत श्री दत्त शिखर संस्थान, श्री अनुसया देवी मंदिर व संस्थानच्या इतर मालमत्तेजवळ येण्यास प्रतिबंध करण्यात आल्याची माहिती दि. १९ रोजी घेण्यात आलेल्या पत्रकार परिषदेत देण्यात आली.
श्री दत्त शिखर संस्थान येथे चिंतामण भारती यांनी गेल्या सहा दिवसांपासून आमरण उपोषण सुरू केले होते. या आमरण उपोषणाविषयी गडाचे महंत यांनी पंचदशनाम जुना आखाड्याकडे तक्रार केली होती. महंत महाराज यांनी दिलेल्या अर्जाची तत्काळ दखल घेण्यात आली असून, अर्जाच्या चौकशीकरिता दोन दिवसांत चौकशी समिती नेमण्यात येणार आहे. ही समिती दि. ३ ऑक्टोबरपर्यंत आपला अहवाल देणार आहे.
त्यानंतर दि. ५ ऑक्टोबर रोजी श्री दत्त शिखर संस्थान येथे पंचदशनाम जुना आखाड्याची व्यापक बैठक आयोजित करण्यात आली आहे. या बैठकीत अंतिम निर्णय घेण्यात येणार आहे. तसेच अंतिम निर्णय होईपर्यंत दि. ५ ऑक्टोबरपर्यंत चिंतामण भारती यांनी श्री दत्त शिखर संस्थान, श्री अनुसया देवी मंदिर व संस्थानच्या कुठल्याही मालमत्तेवर येण्यास सक्त मनाई घालण्यात आली आहे, अशी माहिती पंचदशनाम जुना आखाड्याचे राष्ट्रीय अध्यक्ष महंत मोहन भारती महाराज यांनी पत्रकार परिषदेत दिली.
यावेळी पंचदशनाम जुना आखाड्याचे साधू-संत उपस्थित होते. तर, राष्ट्रीय अध्यक्षांनी घेतलेला निर्णय मला मान्य आहे, असे चिंतामण भारती यांनी यावेळी सांगितले.
