कळमकोंडा (खुर्द) येथे करपलेल्या सोयाबीन पिकाची पाहणी; शेतकऱ्यांशी साधणार संवाद
हिंगोली : राष्ट्रवादी काँग्रेस पार्टी (शरदचंद्र पवार) पक्षाचे महासचिव, युवा आमदार रोहितदादा पवार हे सोमवार, दि. २१ सप्टेंबर रोजी हिंगोली जिल्हा दौऱ्यावर येणार आहेत. जिल्ह्यात कमी पाऊस झाल्यामुळे निर्माण झालेल्या दुष्काळी परिस्थितीची आणि पाण्याअभावी करपून गेलेल्या सोयाबीन पिकाची पाहणी करण्यासाठी ते कळमनुरी तालुक्यातील कळमकोंडा (खुर्द) येथील शेतात प्रत्यक्ष जाऊन पाहणी करणार असून शेतकऱ्यांशी संवाद साधणार आहेत.
या दौऱ्यादरम्यान त्यांच्यासोबत माजी सहकार मंत्री जयप्रकाश दांडेगावकर आणि पक्षाचे हिंगोली जिल्हा निरीक्षक पंकज बोराडे उपस्थित राहणार आहेत.
या पाहणी दौऱ्यासाठी हिंगोली जिल्ह्यातील राष्ट्रवादी काँग्रेस पार्टी (शरदचंद्र पवार) पक्षाचे सर्व पदाधिकारी, कार्यकर्ते, शेतकरी, शेतमजूर, युवक आणि विद्यार्थी यांनी सोमवारी सकाळी ११ वाजता कळमकोंडा (खुर्द) येथे उपस्थित राहावे, असे आवाहन जिल्हा उपाध्यक्ष अ‍ॅड. रवि शिंदे, विधानसभा अध्यक्ष बंडू मुटकुळे, गणेशराव गडदे, माजी जि.प. उपाध्यक्ष मनीष आंग्रे यांच्यासह पक्षाच्या वतीने करण्यात आले आहे.
