गोरे होण्यासाठी स्वतःहून औषधे घेत असल्याची माहिती; व्हिसेरा अहवालानंतर मृत्यूचे नेमके कारण स्पष्ट होणार
अमरावती : अमरावती शहरात २२ वर्षीय BAMS डॉक्टर आदित्य रावते यांचा राहत्या घरात संशयास्पद मृत्यू झाल्याची घटना समोर आली आहे. गोरे होण्यासाठी आदित्य स्वतःहून काही औषधे घेत असल्याची प्राथमिक माहिती असून, याच औषधांचा अतिरिक्त डोस घेतल्याने त्यांचा मृत्यू झाला असावा, असा आरोप त्यांच्या पालकांनी केला आहे. या घटनेने अमरावतीसह वैद्यकीय क्षेत्रात खळबळ उडाली आहे.
आदित्य रावते यांनी नाशिक येथून BAMS पदवी पूर्ण केली होती. त्यानंतर अमरावतीतील एका नामांकित रुग्णालयात ते शिकाऊ (इंटर्न) डॉक्टर म्हणून कार्यरत होते. घटनेच्या आदल्या रात्री नेहमीप्रमाणे कुटुंबीयांसोबत जेवण केल्यानंतर आदित्य आपल्या खोलीत झोपण्यासाठी गेले.
मात्र, दुसऱ्या दिवशी सकाळी बराच वेळ उलटूनही ते खोलीबाहेर न आल्याने कुटुंबीयांनी दरवाजा उघडला. त्यावेळी आदित्य खोलीत मृतावस्थेत आढळून आले. हे दृश्य पाहून कुटुंबीयांना मोठा धक्का बसला.
मिळालेल्या माहितीनुसार, आदित्य यांना लहानपणापासूनच फिट म्हणजेच अपस्माराचा त्रास होता. याशिवाय, स्वतःचा रंग गोरा करण्यासाठी ते स्वतःवरच उपचार करत काही औषधांचे सेवन करत असल्याची माहिती समोर आली आहे. या औषधांचा ओव्हरडोस झाल्याने मृत्यू झाला असावा, अशी शक्यता व्यक्त केली जात आहे.
आदित्य खोलीत उलट्या अवस्थेत आढळून आले होते. तसेच त्यांच्या डोळ्यांतून रक्त येत असल्याचेही समोर आले आहे. घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेतला आणि शवविच्छेदनासाठी पाठवला.
दरम्यान, शवविच्छेदनादरम्यान श्वासावरोध, हृदयविकाराचा झटका किंवा अन्य कारणांमुळे मृत्यू झाला आहे का, याची तपासणी करण्यात येत आहे. औषधांच्या सेवनाचा मृत्यूशी नेमका संबंध आहे का, हे स्पष्ट करण्यासाठी व्हिसेरा अहवालाची प्रतीक्षा आहे. हा अहवाल प्राप्त झाल्यानंतर मृत्यूचे नेमके कारण स्पष्ट होण्याची शक्यता आहे.
या प्रकरणी पालकांच्या तक्रारीवरून वलगाव पोलीस ठाण्यात आकस्मिक मृत्यूची (ADR) नोंद करण्यात आली आहे. पोलिसांकडून या प्रकरणाचा पुढील तपास सुरू आहे.
