पोलिस बंदोबस्त धुडकावत संतप्त शेतकर्‍यांची पालकमंत्र्यांसमोर घोषणाबाजी

पोलिसांचा निष्काळजीपणा; वरिष्ठ पातळीवरून चौकशी सुरू

हिंगोली (Shaktipeeth Highway) : जिल्हाधिकारी कार्यालयाच्या डिपीडीसी सभागृहात आरोग्य विभागाची बैठक पालकमंत्री नरहरी झिरवाळ यांच्या उपस्थितीत घेण्यात आली. या बैठकीत स्थानिक गुन्हे शाखेसह इतर पोलिसांचा बंदोबस्त असतानाही शक्तीपीठ महामार्ग विरोधी समितीच्या पदाधिकार्‍यांनी चक्क बैठकीत प्रवेश करून पालकमंत्र्यासमोर घोषणाबाजी व त्यांच्या आसनाकडे धाव घेतल्याने हे प्रकरण प्रशासनाने गंभीरतेने घेतले असुन याची वरिष्ठ पातळीवरून चौकशी होणार असल्याचे खात्रीलायक सुत्रांकडून समजते.

१५ ऑगस्ट रोजी जिल्हाधिकारी कार्यालयाच्या डिपीडीसी सभागृहात आरोग्य विभागाची बैठक घेण्यात आली. या बैठकीत पालकमंत्री नरहरी झिरवाळ यांच्यासह खासदार, आमदार व जिल्ह्यातील वरिष्ठ आणि पोलिस प्रशासनातील अधिकारीही व्यासपिठावर उपस्थित होते. आरोग्य विभागाची बैठक सुरू असताना जिल्ह्यातील शक्तीपीठ महामार्गाला विरोध करणार्‍या शेतकर्‍यांनी हळूहळू सभागृहात शिरकाव केला. विशेष म्हणजे जिल्हाधिकारी कार्यालयात तसेच सभागृहामध्ये स्थानिक गुन्हे शाखेसह इतर पोलिसांचा बंदोबस्त तैनात करण्यात आला होता. पोलिस बंदोबस्त असतानाही त्यांना धुडकारून संतप्त शेतकर्‍यांनी सभागृहात प्रवेश केला.

आरोग्य विभागाच्या बैठकीत काही लोकप्रतिनिधी महत्वाच्या विषयावर चर्चा करीत असताना अचानक शक्तीपीठ महामार्गाला विरोध करणार्‍या संतप्त शेतकर्‍यांनी शक्तीपीठ महामार्ग कदापिही होऊ दिला जाणार नाही. अशा घोषणा देऊन सभागृह दणाणुन सोडले. अचानक या झालेल्या घोषणा बाजीमुळे उपस्थित पालकमंत्री नरहरी झिरवाळ व लोकप्रतिनिधींही गोंधळून गेले होते. अशा परिस्थितीत आमदार संतोष बांगर व आमदार राजु नवघरे यांनी उभे राहून संतप्त शेतकर्‍यांना शांत करण्याचा प्रयत्न केला.

परंतु शेतकर्‍यांच्या भावना संतप्त झाल्याने त्यांनी लोकप्रतिनिधी व अधिकारी बसलेल्या व्यासपिठाकडे धाव घेतली. (Shaktipeeth Highway) अचानक शेतकर्‍यांचा आक्रमकपणा दिसून येताच सभागृहात उपस्थित अधिकार्‍यांमध्ये एकच गोंधळ उडाला. त्यामुळे काही जणांच्या छातीचे ठोके वाढले होते. पोलिस बंदोबस्त असतानाही या संतप्त शेतकर्‍यांचा सभागृहात कसा शिरकाव झाला असेच अनेक प्रश्न उपस्थित अधिकारी, कर्मचार्‍यांतून उपस्थित केले जाऊ लागले. अखेर पालकमंत्र्यांना पोलिस बंदोबस्तात सभागृहाबाहेर नेण्यात आले.

एकुणच सभागृहातील परिस्थिती ही चिंतेची होती. आरोग्य विभागाच्या बैठकीत पालकमंत्र्यांसह इतर लोकप्रतिनिधी व वरिष्ठ अधिकारी असताना संतप्त शेतकर्‍यांचा शिरकाव हा मात्र विषय चिंतेचा झाला. त्यामुळे या प्रकरणात वरिष्ठ स्तरावरून चौकशी होणार असल्याचे सुत्राकडून समजते. चौकशी अंती यामध्ये काय निष्पन्न होते. याकडे सर्वांचे लक्ष लागले आहे.