नागपूर (Green Shade Net Project) : नागपूर महानगरपालिका (NMC) कडून शहरातील प्रमुख चौकांवर उष्णतेपासून दिलासा मिळावा या उद्देशाने उभारण्यात आलेल्या सुमारे ६५ लाख रुपयांच्या ग्रीन शेड नेट प्रकल्पावर आता प्रश्नचिन्ह निर्माण झाले आहे. नियोजनाच्या अभावामुळे या संरचनांमुळे दिलासा मिळण्याऐवजी वाहतूक कोंडी वाढल्याचे चित्र समोर आले आहे.
तुकडोजी पुतळा चौक येथे उभारण्यात आलेल्या शेड नेटच्या संरचनांमुळे महत्त्वाचा ‘फ्री लेफ्ट’ मार्ग अडथळ्याखाली आला आहे. अजनी पोलीस स्टेशनकडून रेशीमबागकडे जाणाऱ्या वाहनांना आता बांबूचे खांब आणि नेटच्या चौकटीमुळे रांगेत थांबावे लागत आहे. परिणामी, वाहतुकीचा वेग मंदावला असून नागरिकांमध्ये नाराजी व्यक्त होत आहे.
वाहनचालकांच्या मते, “पूर्वी येथे सहजपणे फ्री लेफ्ट घेता येत होता. मात्र आता लांबच लांब रांगा लागतात,” अशी प्रतिक्रिया एका ऑटोचालकाने दिली. तसेच काही नागरिकांनी निदर्शनास आणले की, ज्या ठिकाणी प्रत्यक्षात वाहनांची प्रतीक्षा जास्त होते, त्या ठिकाणी शेड नेटचे कव्हरेजच नाही, त्यामुळे प्रकल्पाचा उद्देशच अपूर्ण राहतो आहे.
सकाळ-सायंकाळच्या गर्दीच्या वेळेत परिस्थिती अधिकच बिकट होत आहे. दुचाकी, रिक्षा आणि चारचाकी वाहनांची गर्दी वाढल्याने वाहतूक कोंडी निर्माण होत असून, वाहतूक पोलिसांनाही परिस्थिती हाताळताना मोठी कसरत करावी लागत आहे.
सेंट्रल अव्हेन्यू परिसरातही अशाच समस्या समोर आल्या आहेत. वैष्णोदेवी चौक येथे सिग्नल ‘ब्लिंकर मोड’वर असतानाही शेड नेट उभारण्यात आले आहे, तर प्रत्यक्षात सावलीची गरज असलेल्या वर्धमान नगर चौक येथे मात्र कोणतीही व्यवस्था करण्यात आलेली नाही. त्यामुळे प्रकल्पाच्या अंमलबजावणीत विसंगती असल्याचे स्पष्ट होत आहे.
एकूणच, नागरिकांना उन्हापासून दिलासा देण्याच्या उद्देशाने राबवण्यात आलेल्या या प्रकल्पामुळे उलट वाहतूक व्यवस्थेवर ताण वाढत असल्याने प्रशासनाने तातडीने पुनर्विचार करण्याची गरज व्यक्त केली जात आहे.
