चिखली (Gutkha Seizure) : चिखली पोलीस स्टेशनमध्ये सन २०२३ पासून विविध गुन्ह्यांमध्ये जप्त करण्यात आलेला एकूण ७१ लाख ९९ हजार ३२५ रुपये किमतीचा प्रतिबंधित गुटखा गुरुवारी (दि. २ जुलै) मा. न्यायालयाच्या आदेशानुसार नगरपरिषद चिखलीच्या डंपिंग यार्डमध्ये नियमानुसार नष्ट करण्यात आला.
मा. न्यायालयाच्या आदेशानुसार संबंधित विभागांच्या उपस्थितीत आवश्यक कायदेशीर प्रक्रिया पूर्ण करून ही कारवाई करण्यात आली. जप्त करण्यात आलेल्या प्रतिबंधित गुटख्याची नियमानुसार विल्हेवाट लावल्यामुळे मुद्देमालाचा गैरवापर होण्याची शक्यता टळली असून अन्न सुरक्षा व सार्वजनिक आरोग्याच्या दृष्टीने ही महत्त्वपूर्ण कारवाई मानली जात आहे.
ही कारवाई पोलीस अधीक्षक निलेश तांबे, अप्पर पोलीस अधीक्षक अमोल गायकवाड तथा उपविभागीय पोलीस अधिकारी प्रदीप पाटील यांच्या मार्गदर्शनाखाली पार पडली. पोलीस निरीक्षक भूषण गावंडे यांच्या नेतृत्वाखाली सहाय्यक फौजदार सुनील माळोदे, पोलीस हेड कॉन्स्टेबल छाया घुबे, राजू चौधरी, विजय किटे, प्रकाश शिंदे, संदीप वाघ, राजेश मापारी व सुनील राजपूत यांनी ही कारवाई यशस्वीरीत्या पूर्ण केली.
प्रतिबंधित तंबाखूजन्य पदार्थांच्या साठवणूक व विक्रीविरोधात पोलीस प्रशासनाकडून सातत्याने कठोर कारवाई करण्यात येत असून, न्यायालयाच्या आदेशानुसार जप्त मुद्देमालाची विल्हेवाट लावण्याची ही कारवाई त्याचाच एक भाग असल्याचे पोलिसांनी सांगितले.
